2015-йисан 15-майдиз чешнелу хизандин кьил, хъсан инсан, Кьурагь райондин КIирийрин хуьряй тир Ватандин ЧIехи дяведин иштиракчи Лукьманан хва Зейнудин Батманов чи арадай акъатна. Вагьши къанлуйрин вилик кIусни ажузвал къалур тавур адан кьегьалвал РФ-дин Игитдин тIвар гуналди (кьейидалай кьулухъ) къейдна.
…Йисар къвез алатзава, амма инсанвал, ислягьвал, хушбахтвал патал чанар къурбанд авур кьегьалрин тIварар халкьди рикIелай алудзавач. Абурун тIварар несилри, даим кузвай шемер хьиз, рикIера хуьзва…
(Россиядин Федерациядин Игит Зейнудин Батмановаз)
Чи дагъларал дагълар ала,
Синерални син ала.
Дуьньядал а син муьтIуьгърай
Я инсан, я жин алач.
МуьтIуьгъарун патал а син
Атанва къе кьегьалар.
Гьахъдихъ эвер гузвайбур я
РикIе авай хиялар.
…Вилив хуьзва хуьруь Игит,
Ам хкведай вахт я лугьуз.
Амма Игит хтанач хьи,
Гуя туна вири ялгъуз.
Гьатна вири хуьруьнвияр
Кьегьал хцин суракьда…
Игитдин гаф гъалиб хьана
Къанлудив гвай яракьдал!..
Душманд вилик агъузнач кьил,
Игитди хьиз тухвана.
Гьич са кIусни кичI авачиз,
Абуруз икI лагьана:
“Квез чизва хьи, зун и чилел
Намус михьи инсан я.
Хаиндин кар ийидалди,
Заз кьейитIа хъсан я…”.
И гафари къенин юкъуз
Руьгь кутазва халкьарик.
Зейнудинан тIвар хуьзва пак
Хайи Кьурагь дагълари.
Кьенвач Игит, ам чахъ гала,
Лепе гузвай пайдах яз.
Дагъвидин гаф, намус хвейи,
Дагъустандин дамах я.
Мукминат Рамазанова,
Дербент шегьердин 15-нумрадин
юкьван мектебдин лезги чIалан муаллим
