Мукьвара ДГПУ-дин ингилис чIалан кафедрада Рутул райондин Киче хуьряй тир шаир, РФ-дин журналистрин ва писателрин союзрин член, РД-дин искусствойрин лайихлу деятель Саид Гьуьсейнован ктабрин презентация кьиле фена.
Гафунин устаддиз цIийи ктабар тебрикиз химиядинни биологиядин илимрин доктор Г.Гьуьсейнов, Дагъустандин халкьдин шаир А.Абдулманапова, публицист ва таржумачи Максим Алимов, жемиятдин векилар тир А.Хархачаев, Гь.Абдулжелилов ва масабур атанвай.
“Лезги газетдин” редакциядихъ галаз фадлай алакъа хуьзвай авторрикай сад тир Саид Гьуьсейнова шиирар кьве чIалал туькIуьрзава: лезги ва рутул. Адан къелемдикай “ГъвечIи хура чIехи рикI”, “Ифенвай симер” тIварар алай ктабар хкатнава.
Мярекатдин иштиракчийри чпин рахунра шаирдин яратмишунрин чIалан кьетIенвилер, ада вичин эсерра къарагъарзавай темаяр, абурун важиблувал къейдна.
РД-дин жемиятдин тешкилатрин “Защитник Отечества” тIвар алай Союздин председатель Гьасангьуьсейн Абдулжелилова шаирдив Дагъустандин милли эдебият вилик тухуник, халкьарин арада дуствал мягькемаруник кьетIен пай кутунай “Дагъустандин намус ва дамах — къизилдин лекь” орден вахкана.
«Лезги газет»
