Украинадикай рахана

3-майдиз Россиядин Президент Владимир Путин Франциядин регьбер Эммануэль Макронахъ галаз телефондай рахана. Идакай “Кремль. Новости” телеграм-каналди хабар гана.

Сифте нубатда В.Путина Э.Макроназ мукьвара президентдин сечкийра гъалиб хьун ва уьлкведин кьилин къуллугъдал мад сеферда хкя хъувун тебрикна.

Президентри Украинадин гьалар веревирд авун давамарна. РФ-дин Президентди Донбассдин республикаяр хуьнин жигьетдай кьиле тухузвай махсус серенжемдикай, гьа жергедай яз Мариуполь азад авунвайдакай, “Азовсталь” заводда миллетбазри кьунвай ислягь агьалияр, ООН-дин генеральный секретарь А.Гутеррешахъ галаз 26-апрелдиз хьайи икьрардив кьурвал, хаталу чкадай ахкъудунин гьерекатрикай малуматар гана.

Украинадин къуватдин къурулушри ийизвай тахсиркарвилер, абуру Донбассдин шегьерриз, хуьрериз гуьлле гунин нетижада ислягь агьалияр рекьизвай делилар Евросоюздик квай уьлквейри кьасухдай  саймиш тийизвайдакайни рахана. Къейд авурвал, Киевдин гьукумдарриз таъсир авуналди, Украинадиз яракьар ракъурунин гьерекатар акъвазаруналди, РагъакIидай патан уьлквейривай ихьтин акьалтIай нагьакьан крарал эхир эцигиз жеда.

РФ-дин регьберди алава хъувурвал, Киевдин тереф гьакъи­къи рахунар давамаруниз гьазур туштIани, и жигьетдай Россия гьамиша ахъа я.

Франциядин терефдик недай-хъвадай затIаралди таъминарунин жигьетдай арадал атанвай глобальный месэлади къалабулух кутунва. Идан гьакъиндай В.Путина кьетIендаказ къейдна хьи, гьалар, сифте нубатда, рагъакIидай патан уьлквейри малумарнавай санкцияр себеб яз четин хьанва.

Серенжемдикай 4-майдин делилар

4-майдин экуьнахъ РФ-дин оборонадин министерстводи ма­лумарай делилралди, махсус серенжем кьиле тухунив эгечIай­далай инихъ Россиядин Яракьлу Къуватри Украинадин 146 самолет ва 112 вертолет, зенитный ракетайрин 287 комплекс, пилот­ галачиз лув гудай 706 аппарат, 2807 танк ва дяведин маса маши­нар, РСЗО-дин 321установка, артиллериядин ва маса 1279  яракь,  дяведин суьрсет, военный махсус 2609 автомобиль тергна.

Къалмакъалдин тахсиркарар

Римдин Папа Франциска къейднавайвал, Украинада къалма­къал арадал атунин, ана Россия махсус серенжем тухуниз маж­бур хьунин себеб НАТО-дин гьерекатрихъ галаз алакъалу я. Адан зенд “Новости” РИА-ди раижнава.

“Россиядин ракIарихъ НАТО-ди амп авуникди” Украинада исятда чалпачух гьалар арадал атанваз гьисабзава ада.

Уртахдаказ кIвалахда

РФ-дин Премьер-министр М.Мишустин Къазахстандин премьер-министр А.Смаиловахъ галаз телефондай рахана.

Абуру кьве терефдизни хийирлу месэлаяр веревирдна. Кьилди къачуртIа, алишверишдинни экономикадин рекьяй санал кIвалахунин алакъаяр мадни хъсанарунин, энергетикадин, улакьрин къурулушдин ва маса хилера уртах проектрин винел кIва­лахунин меслятдал атана.

Шабагьар вахкана

“Сад тир Россия” партиядин генсоветдин секретарь А.Турчака ва ДНР-дин кьил Д.Пушилина Донецкда республикадин аскеррив “Мариуполь азад авунай” сифтегьан 96 медаль вахкана. Идакай 3-майдиз “Новости” РИА-ди хабар гана.

А.Турчакани ЛНР-дин кьил Л.Пасечника “Женгерин лайихлувилерай” медалар республикадин халкьдин милициядин 9 къуллугъчидив вахкана.

Тапрукьрин лишанар

Къалабулух квай гьалди ва вилерин гьерекатри инсанди лугьузвай гафар тапарар я лагьана вири дуьшуьшра тестикьардач. Вич кьиле тухунин бязи лишанрай тапрукь чируникай “Мослента” чешмедиз гипнолог, психолог Елизавета Чеди ихтилатна.­

Адан гафаралди, тапархъанривай инсандин чиниз дуьм-дуьз­даказ килигиз ва чеб секиндаказ тухуз жеда. Амма рикIин гьалар, гьиссер къалурзавай чинин жукIумринни хамунин юзунри, информация агакьарзавай интонацияди гьакъикъат винел акъуд­да. Ихьтин гьерекатар, психологдин фикирдалди, инсандивай гуьзчивилик кутаз жедач. Пешекарди меслят къалурзавайвал, сифте нубатда инсанди лугьузвай гафар адан юзунрин гьалдихъ галаз кьазвани, кьазвачни тайинарна кIанда.

Месела, кIвалахал геж хьанва лагьай хабарди ва я  къалабулух акатдай маса дуьшуьшди инсандин чинал хъвер гъун намумкин кар я. Ида инсанди гьайиф чIугвазва лагьай фикир инкарзава.

“Рахадай макъамда акъвазуниз, яни пауза гуниз, фикир це. Эгер акъвазунар гзаф тикрар жезватIа, инсанди вичихъ яб акалза­вайди вичи  лугьузвай гафарин чIалахъ жезвани, жезвачни чириз­ алахъзава. Ахпа адан вилериз килигна кIанда. Эгер вилери гзаф лупIлупIариз, абур гагь чапла патахъ, гагь эрчIи патахъ юзу­риз хьайитIа, инсанди табзава лагьай чIал я”, — лугьузва пешекарди.

«Лезги газет»