И йикъара Дагъустандин Кьил Сергей Меликован Указдалди СтIал Сулейманан райондин кьил Нариман Шамсудинович Абдулмуталибов РД-дин Гьукуматдин Председателдин заместителвиле тайинарнава.
Къейд ийин хьи, цIийи къуллугъдал Н.Абдулмуталибовал агропромышленный комплексдихъ ва экологиядихъ галаз алакъалу месэлаяр ихтибарнава.
2010-йисалай республикадин чIехибурукай сад тир СтIал Сулейманан райондиз регьбервал гайи Н.Абдулмуталибова вич кар алакьдай регьбер, алакьунар авай тешкилатчи, гьахъвал гвай инсан тирди тестикьарна. Дагъустандин Кьили ихтибарнавай цIийи везифаярни ада чешнелудаказ, лайихлудаказ кьилиз акъуддайдак чна умуд кутазва.
Чи амадаг, гьар йисуз хайи чIалал акъатзавай газетдин тираж артух хьуник, милли меденият вилик финик кьетIен пай кутазвай Нариман Шамсудинович Абдулмуталибоваз РД-дин Гьукуматдин Председателдин заместителвиле тайинарун “Лезги газетдин” редакциядин коллективди мубаракзава, адахъ чандин сагъвал ва мадни еке агалкьунар хьун алхишзава.
«Лезги газет»
