Заз зи улу-буба Шефиев Жамал Азизовичан чIехи стха Милгьаж Шефиев акурди туш. ГьикI лагьайтIа, ам Ватандин ЧIехи дяведа телеф хьана.
Улу-буба Жамал Азизовичан ихтилатрай чир хьайивал, Ватан лап кIеве авай 1943-йисуз Милгьажни Жамал фронтдиз физ кIвачин хьана. Ахцегьрин Агъасиеван тIварунихъ галай колхозда зегьмет чIугвазвай абуру фронтдиз фидай кьетIивал къалурна. Амма чкадин военкоматдай абур, яшар гьеле тамам хьанвач лугьуз, элкъуьрна.
Амма Милгьажа маса улам акъудна. Вичин хайивилин шагьадатнамада 1928-йисакай 1923 авуна. 15 йиса авай жаван вичин мураддив агакьна. Ада женгер кьиле физвай чкайрикай кIвалевайбуруз мукьвал-мукьвал чарар кхьидай.
Школада Милгьаж Шефиев чешнелу ученикрин жергеда авай. Хъсандиз кIелзавай ада вичин юлдашризни тарсарай куьмекар гудай. Дуьм-дуьз илимрал рикI алай Милгьажа гьайванрин, тIебиатдин, инсанрин шикиларни чIугвадай. Фронтдай рахкурзавай чарара ада женгер кьиле физвай чкайрин, вичин женгинин юлдашрин суьретар чIугуна рахкурдай. И чарар вири мукьва-кьилийри кIелдай. Гьайиф хьи, яргъалди икI давам хьанач. Чарарин алакъа атIана. Милгьаж Азизович гел галачиз квахьна. Диде Бидирнисе хва хтунал вил алаз акъвазна. Стхайри, вахари оборонадин министерстводиз, военкоматриз чарар кхьена. Амма Милгьажан гьакъиндай тайин са малумат хьанач.
Анжах 1979-йисуз СССР-дин оборонадин министерстводай чар хтана. Ана кхьенвай: “Шефиев Милгьаж Азизович Белоруссия душмандикай азадзавай женгера Гомель шегьердин патарив телеф хьана”.
15 йиса аваз Ватан душмандикай хвейи хва чи рикIера гьамиша амукьда.
Амина Саидова
