Алатай гьафтеда Ставрополдин крайдин Суворовский станицада боксдай СКФО-дин кIвенкIвечивал патал 2008-2009-йисара дидедиз хьанвай аялрин арада акъажунар кьиле фена. Ана Ставрополдин крайдай, Дагъустан, Чечня, Ингушетия, Кабардино-Балкария, Кеферпатан Осетия-Алания республикайрай тир 170-далай виниз жаван боксёрри чпин гъутарин гьунарар къалурна. Дагъустандин хкянавай командадик кваз иштиракай спортсменри хъсан нетижаяр — къизилдин — 5, гимишдин — 2 ва буьруьнждин 11 медаль къазанмишна.
Акъажунра кIвенкIвечи чкаяр кьурбурун арада СтIал Сулейманан райондин администрациядин спортдин, туризмдин ва жегьилрин крарин рекьяй комитетди рекье тунвай спортсменар — Имам Сейфулаев (48 кг-дал къведалди заланвал авайбурун арада) ва Агьмедагъа Шамсудинов (57 кг-дал къведалди заланвал авайбурун арада) ава. Жегьилриз талукь дережайрин дипломар ва грамотаяр гана. Кьилинди, гила абуру республикадин хкянавай командадик кваз майдиз Махачкъалада кьиле фидай сборра иштиракда, Россиядин кIвенкIвечивал патал акъажунра чпин устадвал къалурда.
Къейд авун лазим я хьи, КIварчагъа кардик квай Гь.Аллагьвердиеван тIварунихъ галай бокс вилик тухудай центрада тренер Альберт Межидован гъилик вердишвилер къачузвай И.Сейфулаев ва А.Шамсудинов Дагъустандин Кьиблепатан зонадин, ЦIийи Къаякентда республикадин дережада аваз кьиле фейи турнирдин, Дагъустандин кIвенкIвечивал патал акъажунрин гъалибчияр я. Къуй чи кьегьалар вилик квай акъажунрайни гъалибвал гваз хтурай!
Рагнеда Рамалданова
