Дагъустандин здравоохраненидин министерстводин пресс-къуллугъди хабар гузвайвал, алатай гьафтеда “Сад тир Россия” партиядин региондин отделенидин секретардин сад лагьай заместитель, РД-дин Халкьдин Собранидин (НС) Председателдин заместитель Сайгидагьмед Агьмедова республикадин кардиологиядин ва рикIинни дамаррин хирургиядин центрада кьиле тухвай совещанидал партиядин “Сагълам гележег” проектдин сергьятра аваз “Дагъустан Республикада рикIинни дамаррин азаррихъ галаз женг чIугун” госпрограммадиз талукь месэлаяр веревирдна…
Совещанида партиядин проектдин координатор, РД-дин НС-дин здравоохраненидин, зегьметдин ва яшайишдин, политикадин рекьяй комитетдин председатель Ильяс Мамаева, депутатри — комитетдин членри — Малик Баглиева, Гьажимурат Малаева, Гьасан Османова, РД-дин здравоохраненидин министр Татьяна Беляевади, РКБ-дин кьилин духтур Мегьамед Иманалиева, республикадин центральный больницадин кьилин духтур Газиявдибир Мусаева ва кардиоцентрадин къуллугъчйири иштиракна. Ам башламишдалди вилик кIватI хьанвайбур, центр арадал атуник чпин пай кутур уьлкведин тIвар-ван авай кардиохирургриз бахшна, мукьвара кутунвай цIийи аллеядиз тамашна. Ана цанвай 22 къелемдикай гьардаз садан тIвар ганва.
Мярекат ачухдайла, С.Агьмедова къейд авурвал, партиядин проект здравоохраненидин къурулушда жуьреба-жуьре хилер еримлу авунихъ элкъуьрнава. Амма рикIинни дамаррин азаррихъ галаз женг чIугуниз иллаки артух фикир гузва, гьикI хьи, абуру уьлкведа инсанар кьиникьал гъизвай себебрин жергеда 1-чка кьазва. Ада мадни алава хъувурвал, и хиле гьалтзавай месэлаяр гьялун патал медицинадин идараяр алай аямдин тадаракралди таъминарунихъ, республикадин яргъал тир районра яшамиш жезвай агьалияр патал медицинадин куьмек тIем акакьдайди хьунихъ, духтуррин пешекарвал хкажунихъ еке метлеб ава.
Гуьгъуьнлай министр Т.Беляевади республикадин кардиологиядин къуллугъдин кIвалахдикай суьгьбетна. И хиле чи регионда кардик квай рикIинни дамаррин азарар сагъардай 2 центр ва 5 отделение лазим вири тадаракралди таъмин я. Идани тади гьалда кьабулзавай азарлуйриз — инсульт ва инфаркт хьанвайбуруз гузвай куьмекдин ери хъсанарнава. Эгер са тIимил вахтар идалай вилик азарлуяр маса регионрин кардиоцентрайриз рекье туниз мажбур жезвайтIа, гила лазим операцияр чи республикада кьилиз акъудзава.
Вичин нубатдай, проектдин координатор И.Мамаева, коронавирусдин тIугъвал себеб яз, региондал ацалтай четинвилер гила кьулухъ галамайдал, алай вахтунда медицинадин идараяр адетдин къайдада кIвалахдив эхгечI хъувунвайдал фикир желбунихъ галаз сад хьиз, проектдин кьилин макьсад агьалийрин уьмуьр яргъи авун ва кьиникьар тIимиларун тирди, идани рикIинни дамаррин азаррихъ, онкологиядихъ, аялар кьиникьихъ галаз женг чIугун хьтин са жерге проектар кьилиз акъудун истемишзавайди къейдна.
Совещанидал республикадин кардиодиспансердин, кардиоцентрадин, РКБ-дин ва медицинадин маса идарайрин кьилин духтуррини докладар авуна. ИкI, малум хьайивал, 2021-йисуз Дагъустанда, виниз тир технологийрин куьмек агакьарун яз, 3239 операция кьилиз акъудна. И рекъемрин бинедаллаз чи республика СКФО-да 2-чкадал ала. Дагъустандин кардиоцентрада азарлуйрив виниз тир технологийрин 16 жуьре куьмек агакьарзава. Им СКФО-дин субъектрин арада виридалайни виниз тир рекъем я.
Здравоохраненидин министерстводи рикIинни дамаррин азарар фадамаз дуьздал акъудун ва идахъ галаз сад хьиз кьиникьин дуьшуьшар тIимиларун патал рикIинни дамаррин азаррин вилик пад кьуниз ва агьалияр диспансеризация авуниз, гьакIни сагълам уьмуьр кечирмишуниз артух фикир гунин теклифдин тереф совещанидин вири иштиракчийри хвена.
Рагнеда Рамалданова
