ЦIийи ктаб

Бажарагълу инсанар чпиз вири терефрихъай пай ганвайбур,  бажарагълубур жеда лугьуда. Ахьтинбуруз дуьзвал, гьахъ-адалат, чпин чирвилерихъ — къуват-такьатдихъ инанмишвал, инсанвилин виниз тир ерияр хас я. Гьахълувилин гужлу сес хкажуналди, ахьтинбуру инсанриз уьмуьрдин къимет­-метлеб, кьиле физвай крарин, вакъиайрин себебар, асул гьакъи­къат ачухарда, чирда. Гьа ихь­тинбурукай сад тир гьуьрметлу  Багъир  Ражабович  Ражабовахъ  галаз зун 80-йисарилай инихъ таниш я. Ялавлу публицист, оратор, об­ще­ст­­венный деятель, юстициядин полковник, РД-дин лайихлу юрист, СССР-дин халкьдин контролдин отличник, шаир, писатель…

Дагъустан Республикадин юстициядин министерствода яргъал йисара халкьдин майишатда, жемиятдинни диндин тешкилатрихъ галаз правовой пропагандадин кIва­лахдин, гьакIни жемятрихъ галаз алакъадин отделрин начальник яз, Б.Ражабова юриспруденциядай гъавурдик кутунин кIвалах гегьеншарна, агьалияр чпин ихтияррин жигьетдай гъавурдик кутаз, лекцияр кIелна, хейлин гуьруьшар кьиле тухвана. ИкI, Б.Ражабова кьил кутуналди, правовой пропагандадин координационно-методический совет тешкилнай. Публицист, юрист яз, вичин гзаф макъалайра ам законсузвилериз, 90-йисара чукIуру­нин, алаш-булашдин, гъиляй къведайвал авунин чIуру гьалариз акси экъечIиз хьана. Уьлкведа къарсатмишдай вакъиаяр кьиле физвайла, халис ватанперес бейтереф яз акъвазнач, ада вичин сес хкажна.

Багъир Ражабович Дагъустандин коммунистрин тешкилатдин активный членрикай, регьберрикай сад язни чида. КПРФ-дин Дагъустандин организация арадал хкуник адан еке пай ква.

Вичин къелем ахтармишунив Багъир гьеле мектебда кIел­замаз эгечIна. Адан сифте шиирар, ма­къа­лаяр, очеркар Хивдин райгазетда, литературадин альманахра ва кIватIалра чапзавай. КIвалахда хьиз, яратмишунрани Б.Ражабоваз дуьзвал, рикIин михьивал, ачухвал хас я. 1974-йисалай эгечIна, адан шииррин “Ветерок”, “Рассвет”, “Завещание”, “Заря жизни”, “Зори” ва маса кIватIалар акъатна.

Багъир Ражабович бажарагълу писатель хьиз машгьур авур эсеррикай сад адан “Намусдин сир” (“Тайна чести”) роман я. Адакай за чи газетдин шаз апрелдиз акъатай 13-нумрада ге­гьеншдиз кхьенва. Къенин ихтилат 2021-йисан декабр­диз, 250 экземплярдин тираж аваз, “Мавел” издательствода “ЦIийи йикъан­ пакамахъ” (“На заре нового дня”) тIвар алаз акъатнавай нубатдин ктабдикай я.

Шиирралди кхьенвай сад ла­гьай­ пай Дагъларин уьлкведин  баркаллу чинриз бахшнава. И кьиле инкъилабчияр тир Тарикъули Юзбегован, Дадаш Ражабован ва  алим-просветитель Темирхан Шалбузован крарикай, кьисметрикай суьгьбетзава. Идалай гуьгъуьниз табасаран чIалал тестифнавай “Ихьтин вахт алукьна”, (“Вот настало такое время”) поэма къвезва. Ам эхиримжи йисара инсаниятдал гьужумнавай хаталу тIугъвалдиз талукьарна. И эсердай чаз «яру зонада» чпин пак буржи намуслувилелди кьилиз акъудзавай, чпизни еке хаталувал аватIани, инсанар фендигар азардикай къутармишзавай баркаллу духтуррин еке зегьмет аквазва.

Пуд лагьай кьил, пай Багъир Ра­жабован публицистикадин макъалайрикай ибарат я. Уьлкве къарсатмишай къалабулухринни шулугърин, алаш-булашдин 90-йисара, гьакI гуьгъуьнлайни ада гьахъ-адалат, садвал, къайда-низам патал вичин ялавлу сес хкажна. Ам Ма­хачкъаладин гзаф агьалияр кIватI хьанвай майданрал мукьвал-мукьвал рахадай. “Советская Россия”, “Дагъустандин правда”, “Советский Дагестан”, “Голос правды”  ва маса газетра бажарагълу публицистдин гзаф макъалаяр чапна. ЧIехи ватанперес яз, законсузвилериз, сад тир чIехи уьлкве чукIуру-низ, гьахъсузвилериз акси экъечIна. “Пусть осенит нас отвага отцов”, “Неомаккартизм”, “В наш дом стучится беда”, “Не проявлять спешки”, “Конституция — гарант единства и стабильности”, “Мое кредо — закон”, “Протест беспределу”, “Парад президентов — развал страны”, “Что порождает спекуляцию?” ва масабур гьа ихьтин хци месэлаяр къара­гъарнавай макъалайрик акатзава.

Ктабдин кьуд лагьай кьиле Ба­гъир Ражабован яратмишунрин ва общественный кIвалахдиз анализ, къимет ганва.

Вад лагьай кьиле чаз Б.Ра­­жабован уьмуьр, адан хайи ерияр — Хив шикилрай аквазва. ЦIийи ктаб мубарак авуналди, чаз гьуьрметлу Багъир Ражабовичахъ сагъламвал, хизанда хушбахтлувал хьун, адан гъиликай мад ва мад итижлу шейэр хкатун кIанзава.

Ш.Шихмурадов