2022-йисуз Дагъустанда бегьерлувал хкажунин нетижада 125 агъзур тонндилай тIимил тушиз прунз кIватIун пландик кутунва. Алатай йисуз и делил 119,3 агъзур тонндиз барабар тир, хабар гузва РД-дин Гьукуматдин пресс-къуллугъди.
“Дагъустанди гьасилзавай прунздин кьадар мадни гзафарда. Идакай РД-дин хуьруьн майишатдин министерстводин нетижаяр кьадай коллегиядал региондин Гьукуматдин Председатель Абдулмуслим Абдулмуслимова хабар гана. 2022-йисуз шазан кьадардин майданра прунз цун, гьа са вахтунда, бегьерлувал хкажунин гьисабдай 125 агъзур тонндилай тIимил тушиз прунз кIватI хъувун фикирда кьунва”, — лугьузва малуматда.
РД-дин хуьруьн майишатдин министр Баттал Батталован гафаралди, 2021-йисуз прунз 27 агъзур гектардин майданда цанай. Бегьер кIватIдай вахт алукьдалди амукьайди 26,5 агъзур гектар тир, анрай 119,3 агъзур тонн (са гектардай 45,1 центнер) вахчуна.
“2021-йисан бегьер республикада прунз цаз башламишай чIавалай инихъ кIватIнавай виридалайни чIехиди хьана. Лацу техил гьасилунал гьалтайла, Дагъустандилай вилик чкадал анжах Краснодардин край ала. Дадунал гьалтайла, “Къизлярдин дуьгуьдиз” муьштерийри виниз тир къимет гузва. ГьакIни республикадин мулкунал еке майданра прунз гьасилзавайбурун арада Бабаюрт, Тарумовский, Гуниб ва Хасавюрт районар ава”, — алава хъувуна пресс-къуллугъди.
«Лезги газет»
