Эхиримжи 2 йисан вахтунда Дагъустанда мугьманар кьабулдай 20-далай гзаф цIийи кIвалери туристар патал ракIарар ачухна. Санлай къачурла, республикада абурун кьадар 88-дав агакьнава, хабар гузва РД-дин туризмдин ва халкьдин художественный сеняткарвилерин министерстводи.
“Чна гьар йисуз гуьзлемишзавайвал, мугьманар кьабулдай кIвалерин кьадар иллаки республикадин дагълух чкайра къвердавай гзаф жезва. Эгер 2020-йисуз мугьманар кьабулдай кIвалерин сиягьдик 65 объект кутунвайтIа, 2022-йисуз министерстводин реестрда 88 кIвал къейднава”, — лугьузва малуматда.
Пресс-къуллугъдин делилралди, республикадин хуьрерин муниципальный тешкилатра туризмдин хел еримлу авун министерстводин вилик эцигнавай виридалайни важиблу месэлайрикай сад я. Абуруз куьмек гун патал 2019-йисуз сифте сеферда кьиле тухвай республикадин хуьрерин ва аграрный туризмдин проектрин конкурс тешкилнай. Адан гъалибчийривай алатай йисуз зур миллион манатдин кьадарда аваз пулдин такьатар къачуз хьана.
“2021-йисуз гъалибчийрин кьадар 20-дав агакьдалди гзаф, гузвай пулунин кьадар лагьайтIа, 500 агъзур манатдиз барабар хьана. Гьа икьван кьадарда аваз алай йисан конкурсда гъалиб хьайибурузни гун пландик кутунва. Ихьтин куьмекди карчияр гьевеслу ва бизнесдин и хел еримлу ийизва”, — алава хъувуна министерстводи.
Идалай вилик хабар гайивал, Дагъустандин властри Россиядин аксина кьабулнавай сергьятламишдай серенжемрин шартIара республикадиз къведай туристрин кьадар садрани тахьай кьван дережада гзаф хьун гуьзлемишзава. Дагъустандиз мугьман жезвай туристрин кьадар йисалай-суз артух жезва. ИкI, 2021-йисуз Дагъустандиз атай туристрин кьадар сифте сеферда яз 1 миллион касдилай алатна. Адалай вилик квай йисан кьадардилай им 29,1 процентдин виниз тир делил я.
«Лезги газет»
