Махсус серенжем — галай-галайвал
Россиядин оборонадин министр С.Шойгуди лагьайвал, уьлкведи ЛНР ва ДНР азад авунин план галай-галайвал кьилиз акъудзава. Ислягь уьмуьр къайдадик кухтунин серенжемар кьиле тухузва. Идакай “Интерфакс” чешмеди хабар гана.
РФ-дин оборонадин министерстводи им кар алай макьсад тирдакай мартдин эхирда малумарнай.
20-апрелдин экуьнахъ РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ чи кьушунри Украинадин 140 самолет, зенитный ракетайрин 253 комплекс, пилот галачиз лув гудай 496 аппарат, 2388 танк ва дяведин маса машинар, РСЗО-дин 256 установка, артиллериядин ва маса 1029 яракь, дяведин суьрсет, военный махсус 2232 автомобиль тергна.
Гьахъ винел акъудда
Россиядин МИД-дин кьил С.Лаврова хабар гайивал, уьлкведи Украинадин Бучада ислягь агьалияр кьиникьихъ галаз алакъалу мусибатдин агьвалатдин гьакъикъат тайинарда. Идакай “ТАСС” чешмеди хабар гузва.
Министрди къейдна хьи, Украинадин яракьлу къуватри ва цIийи миллетбазрин кIеретIри Бучада авур вагьшивилериз талукь яз Москвади ахтармишунар тухузва. Малумарайвал, ахтармишунин серенжем кьилиз акъудун патал Сирияда ва маса чкайра хьайи тахсиркарвилер дуьздал акъудай тежрибалу ксарикай ибарат махсус комиссия арадал гъанва.
РикIел хкин, идалай вилик ООН-дин генсек А.Гутерриша Бучадин мусибатдиз талукь яз международный аслу тушир ахтармишунар кьиле тухуниз эвер ганай.
Мад яракьар ракъурдайвал я
Пентагонди хабар ганвайвал, США-ди Украинадиз яракьар авай ирид самолет ракъурда. 18-апрелдиз Лацу кIвалин векил Псакиди хабар ганай хьи, алатай ял ядай йикъара Америкади, военный куьмек яз, 4 самолет Украинадиз ракъурна. США-дин президент Ж.Байдена са шумуд югъ идалай вилик Украинадиз 800 миллион доллардин къимет авай яракьар рекье твадай къаст ава лагьанай.
Хатасузвал хуьдайвал
Туьркиядин къецепатан крарин министр М.Чавушогълуди малумарайвал, Туьркиядин терефдиз Иракдин мулкарин битаввал чIурдай къаст авач. Кьиле тухузвай серенжем лагьайтIа, уьлкведин часпаррин хатасузвал хуьн патал я. Адан фикир «Новости» РИА-ди раижнава.
18-апрелдиз Туьркиядин оборонадин министерство Курдистандин фялейрин партиядин (РПК) боевикриз акси яз военный серенжем кьиле тухунив эгечIна. Ам Иракдин кеферпата кьиле физва. “Чна чи ватандашар патал хатасузвал таъминарда, террордихъ галаз женг чIугвада”, — лагьана Чавушогълуди.
Туьркиядин “Anadolu” чешмедин делилралди, серенжем кьилиз акъудунал спецназдин ва гьавадин къуватар желбнава.
Къарабахдин гьалар веревирдна
РФ-дин Президент Владимир Путинан ва Эрменистандин премьер-министр Никол Пашинянан арада 19-апрелдиз Ново-Огаревода гуьруьш кьиле фена.
Кремлдин сайтди хабар гузвайвал, Азербайжандинни Эрменистандин арада рафтарвилер къайдаламишун патал абур Москвадин, Бакудин ва Еревандин алакъайрик активвал кутунин меслятдал атана.
2021-йисан 26-ноябрдиз къулар чIугур пуд терефдин икьраррив кьурвал, делимитациядин ва Эрменистандинни Азербайжандин часпардин мулкунин хатасузвилин месэладин гьакъиндай кьве терефдин комиссия арадал гъидайвал я.
В.Путинани Н.Пашиняна Россиядинни Эрменистандин мулкар чара уьлквейри ишлемишуниз, биохатасузвал чIуруналди, Москвадизни Еревандиз зарар хьуниз рехъ тагун герек тирди малумарна.
Пешекарди тагькимарна
Иммунолог В.Болибока къейднавайвал, коронавирус акатна, сагъ хъхьай инсандик “филдин азар” акатун мумкин я. Адан гафар “Ura.ru” чешмеди раижна.
И азардиз маса гафаралди элефантиаз лугьузва. Пешекарди къейд авурвал, ковиддиз дурум гайидалай кьулухъ элефантиаздин лишанар тек-туьк дуьшуьшра пайда жеда.
Идалай вилик духтур С.Мартыновади коронавирусдин чIуру судур алудун патал хъсан меслят къалурнай. Адан гафаралди, вирусдик азарлу хьайидалай кьулухъ, гьатта тамамдиз сагъ хъхьанватIани, инсанри чпин сагъламвал ахтармишун герек я. Гьа жергедай яз, D витаминдин дережа ахтармишун, ивидин анализ вахкун ва рикIин жукIумрин гьалдиз къимет гун важиблу я.
«Лезги газет»
