Квез чидани?
— Замбия Кьиблепатан Африкадин государство я. Уьлкведин умуми майдан 752,6 агъзур квадратный километрдикай ибарат я. Меркез — Лусака.
— Алай вахтунда Замбияда 19 миллиондилай гзаф инсанар яшамиш жезва.
— Замбиядин сергьятрив Ангола, Конго, Танзания, Малави, Мозамбик, Зимбабве, Ботсвана ва Намибия гва.
— 1960-йисал кьван и уьлкве Британиядин колония тир ва адаз Кеферпатан Родезия лугьузвай.
— Замбия хъсан тIебиат авай чка я. Милли паркариз килигун патал аниз къецепатан уьлквейрай гзаф агьалияр физва.
— Машгьур Виктория чарчар (адан кьакьанвал — 120 метр я, гьяркьуьвал — тахминан 1800 метр) Замбиядинни Зимбабведин часпардал ала. Замбиядиз туристар гзаф финин кьилин себебрикай сад Виктория чарчардихъ галаз алакъалу я.
— Замбияда Кьиблепатан Луангва тIвар алай милли парк ава.
— Замбия Африкадин хатасуз уьлквейрикай сад я.
— Замбиядин мулкара хаталуди тир “цеце” тIветI гьалтда. И тIветIрехъ галаз женг тухун патал уьлкведа махсус къуллугъ кардик ква.
— Замбияда кьифер ва гьашаратар чкадин недай лезетлу затIар (деликатес) яз гьисабзава.
— И уьлкведа машгьур милли тIуьнрик уькIуь тушир це яшамиш жезвай таза балугърикай гьазурнавай хуьрекар акатзава.
— Африкадин уьлквейрикай Замбияда сифте яз пластикдикай пулар ийиз эгечIна.
— И уьлкведа дуьньяда виридалайни “яшлу” баобаб тар ава. Алимрин фикирдалди, алай вахтунда тарцин 1500 йис я.
— Ина гьайванрин алем гзаф девлетлуди я. Гьа жергедай яз еке япар алай Африкадин машгьур филерни яшамиш жезва.
— Уьлкведин официальный чIал ингилис чIал я. Амма чкадин агьалийри 60-далайни гзаф чIаларикай рахунра менфят къачузва.
«Лезги газет»
