И йикъара Мегьарамдхуьруьн райондин Советский хуьре мини-футболдин цIийи майдан ачухуниз талукьарнавай шад мярекат кьиле фена. Идакай чаз райадминистрациядин пресс-къуллугъди хабар гана. Шад мярекат гьар йисуз апрелдин вацра къейдзавай Сагъламвилин йикъаз ва ЧIехи Гъалибвилин 77 йис тамам хьуниз талукьарнавай. Спортдин цIийи майдан “Хуьрерин мулкар комплекснидаказ вилик тухун” госпрограммадин сергьятра аваз туькIуьрнава.
Шад мярекатда Мегьарамдхуьруьн райондин кьил Фарид Агьмедован 1-заместитель Фейруддин Рагьимханова, райадминистрациядин жавабдар къуллугърал алай ксари, “Дагсельхозстрой” ГКУ-дин директор Гитиномегьамед Абдуллаева, Советский хуьруьн поселенидин кьил Эмирагъа Асварова, мектебда кIелзавай аялри ва муаллимри, хуьруьнвийри иштиракна. Мярекатдин иштиракчийриз, хуьруьн агьалийриз спортдин цIийи майдан ачухун вичин ва райондин кьилин тIварунихъай тебрик авуналди, Ф.Рагьимханова кIвалахар хъсан ери аваз кьилиз акъудунай устIарриз сагърай лагьана. Футболдин мини-майданди хуьруьн кIалуб дегишарунихъ галаз сад хьиз, жуьреба-жуьре яшарин агьалийриз спортдал машгъул жедай, устадвал хкаждай, сагъламвал мягькемардай мумкинвал гудайди, кьилинди, ихьтин крари район вилик физвайди къалурзавайди, гьакIни уьлкведин, республикадин кьиле авай ксарин куьмекни галаз районда агьалийрин уьмуьрдин ери хъсанарунихъ элкъуьрнавай вири программаяр кьилиз акъудзавайди къейдна. Мисал яз, мини-футболдин майданар Чепелрал, Мегьарамдхуьре, Бут-Къазмайрал, Билбилхуьре, Хъартас-Къазмайрал ачухнавайди рикIел хкана.
Советский хуьруьн агьалийриз шад вакъиа Г.Абдуллаева, Э.Асваровани тебрикна, Дагъустандин кьиле авай ксари республикадин хуьрера гьалар хъсанарун патал хейлин крар кьилиз акъудзавайди къейдна.
Адет хьанвайвал, яру лент атIайдалай кьулухъ цIийи майдандал спортшколайрин командайрин арада къугъунар кьиле тухвана.
РикIел хкин: спортдин майдан туькIуьрунин кIвалахрив алатай йисан 1-сентябрдиз эгечIнай. Ада 1125 квадратный метр кьазва. Майдан элкъвена ракьун сеткадалди кIевнава, стадиондин винел пад искусственный векьералди туькIуьрнава, эквер тунва, патарив гвай чкаярни аваданламишнава.
«Лезги газет»
