Вирироссиядин “Тарар — чан алай тIебиатдин памятникар” программадин сергьятра аваз, European Tree Worker (тарарихъ гелкъуьнал машгъул, са кьадар йисарин тежриба авай пешекаррихъ галаз кIва-лахзавай международный программа) системадин сертификатар гвай Москвадай тир пешекарри Дагъустандин мулкунал, кьилди къачуртIа, Дербентдин жуьмя-мискIиндин ва Самурдин тамун мулкунал экъечIзавай чинарар (платанар) ахтармина.
Даглесхоздин пресс-къуллугъди хабар гузвайвал, пешекарри “Россиядин гзаф яшар хьанвай тарарин милли реестрдик” акатзавай Дербентдин чинардин сагъламвилин гьал хъсанарунихъ элкъуьрнавай серенжемар кьабулна.
ГьакIни хатасузвилин жигьетдай мад 5 чинар авай гьал ахтармишна. Самурдин тама авай чинардин яш ахтармишунин серенжемарни кьабулна. Къейдзавайвал, дуьм-дуьз делилар ахтармишунрилай кьулухъ са варз алатайла чириз жеда.
“Арадал атанвай нетижайри тарариз лазим сагъламардай серенжемрин комплексни туькIуьрдай мумкинвал гуда”, — баян гана тарарихъ гелкъведай пешекаррин Союздин президент Сергей Пальчикова.
Даглесхоздин руководитель Вагьаб Абдулгьамидован гафаралди, яш тайинаруни Самурдин тамун чинар “Россиядин гзаф яшар хьанвай тарарин милли реестрдик” кутадай мумкинвал гуда.
Къейд ийин, бязи ахтармишунардайбуру гьисабзавайвал, Самурдин тамун платандин яш 800 йисалай артух я. Ам Дагъустандин виридалайни яшлу тар яз гьисабзава. Тарцин тан элкъвена кьун патал 15-19 кас лазим жезва.
Адет яз, чинарар 800-1000 йисара яшамиш жезва, абурун бязи жуьреяр лагьайтIа, гьатта 2000 йисалди амукьун мумкин я.
«Лезги газет»
