“Ростелеком” ПАО-дин Дагъустандин филиалда идарадин директор Руслан Ярагьмедов республикадин СМИ-рин векилрихъ галаз гуьруьшмиш хьана. Мярекат алатай йисан кIвалахдин нетижаяр кьуниз талукьарнавайди тир. Гуьруьшда Дагъустандин рекъемрин рекьяй виликди финин министр Юрий Гьамзатова иштиракна.
Йисан нетижайри шагьидвалзавайвал, республикада рекъемрин рекьяй еримлу хьунин кIвалах активнидаказ кьиле физва. И кардик гьерекат кутурди, гьелбетда, яргъал мензилда аваз кIвалахунин къайда ишлемишунал гъайи тIугъвалдин вахт хьана. Чна, кIваляй къецел экъечI тийиз,тарсар кIелзавай, шейэр маса къачузвай, машгъуларзавай.
Малум хьайивал, 2021-йисуз Ростелекомдин къуллугърикай республикадин 37 агъзур абонентди менфят къачуна.
“Алакъадин 15 гьалкъа алай аямдин истемишунриз жаваб гудайвал туькIуьруни — куьгьне хьанвай тадаракар дегишаруни ва, интернетдин, телевиденидин, телефониядин къуллугъар ерилудаказ ишлемишиз жедайвал, алакъадин каналар гегьеншаруни, карантиндин вахтунин сергьятвилерин шартIара сетдал гзаф гуж ацалтуникай кьил къакъудиз алакьна. Ростелекомдин къуллугърик экечIуниз талукь яз агьалийрилай атай арзайрин кьадарни алатай йисуз гзаф хьанва”, — малумарна Р.Ярагьмедова. Ада хабар гайивал, идаради яшайишдин рекьяй важиблу ругуд проект уьмуьрдиз кечирмишнава. ИкI, шегьерринни хуьрерин арада рекъемрин къурулушдиз талукь тафават арадай акъудунин программадин сад лагьай пай куьтягьнава. Дагъустандин 40 районда авай 309 хуьр Wi-Fi технологиядин куьмекдалди пулсуз социальный интернетдин сетдик кутунва. И кар патал 2600 километрдин мензилдиз оптоволоконный алакъадин линияр чIугунва. Абурук райцентрайра ва мукьварив гвай хуьрера авай важиблу объектар — мектебар, фельдшервилиннии акушервилин пунктар, библиотекаяр галкIуриз жеда.
Кьакьан дагъда авай чкаяр патал им, къейд ийин, важиблу агалкьун я. Мисал яз, Рутул районда интернетдик 15 хуьр кутунва. ЦIахур дередин Мухах, Женых, Аттал, Курдул хуьрер виридалайни яргъа авайбур я. ХъуьтIуьн вахтунда абур живедин маргъалри, селлери, къванер авахьуни “чIехи дуьньядикай” атIузва. Алакъа авачиз амукьай инсанар акьалтIай четин шартIара гьатзава. Гила лагьайтIа, интернетдикай менфят къачуз жеда. Бязи чкайра интернет-алакъа спутникдин куьмекдалди таъминарзава. Интернетдин алакъа пулсузди хьунни иллаки важиблу я. Дагъвийрин гьар са кепек кьетIен гьисабда ава. “УЦН” программадин 2-пай уьмуьрдиз кечирмишунихъ галаз сад хьиз амай хуьрерни алай аямдин алакъадик кутада.
Карчийрин ва административный къурулушрин арада еке машгьурвал виртуальный АТС телефониядихъ ава. Са йисан вахтунда республикада адаз ийизвай итиж 58 процентдин хкаж хьанва. Алатай йисан вахтунда и къуллугъ 241 абонентди, гьа жергедай яз гъвечIи, юкьван ва чIехи бизнесдин векилри, идарайри кутунва.
Филиалдин пресс-секретарь Лейла Султановади къейд авурвал, республикадин хуьрерин администрацийрин арада рекъемрин технологийрин бинедаллаз уькIуьрнавай алай аямдин алакъадикай сифтени-сифте менфят къачурди Ахцегь районда авай, Азербайжандихъ галаз сергьятдал алай гъвечIи Фиярин хуьруьн администрация хьана.
Малум хьайивал, шегьерра “Акьуллу видеоахтармишунин”, “Акьуллу домофон”, “Акьуллу шлагбаум” къуллугъриз ийизвай итиж къвердавай артух жезва. Яшайишдин комплексрикай сада электроэнергиядин 48 “Акьуллу счетчик” эцигнава.
Проектар здравоохраненидин, государстводин къуллугърай гьакъи гунин ва минюстдин хилерани уьмуьрдиз кечирмишнава. И кIвалах РД-дин рекъемрин рекьяй виликди финин министерстводихъ галаз санал тамамарна.
Юрий Гьамзатова интернетдик ЕСППД-дин (делилар агакьарунин сад тир сеть) системадай кутун патал туькIуьрнавай цIийи проектрикай лагьана.
Мектебра кIелзавай аялрив ахтармишнавай, ерилу контент агакьун, абуру чпин медиасавадлувал артухарун лазим я. “Ростелекомди” ва министерстводи и фикирар, гьа жергедай яз гъвечIи хуьрера, санал кIвалахуналди кьилиз акъудда. Чахъ бажарагълу, чирвилер къачунихъ ялзавай ва чпикай гележегда виниз тир еридин пешекарар хьуникай хияларзавай жегьилар гзаф ава. Интернетдикай абуруз еке куьмек жеда.
Жасмина Саидова
