СтIал Сулейманан райондин ЦIийи­хуь­руьн школада Украинада кьиле тухузвай  мах­сус серенжемда телеф хьайи лейтенант Бабаев Алаудин Шагьабудиновичаз талукьарнавай митинг кьиле фена. Ам райондин образованидин управленидин методист Маина Аликберовади ачухна.

И цIарарин авторди  кIватI хьанвайбуруз Украинада кьил хкажай, гьукум чпин гъиле кьур фашистар, нацистар терг авун патал ту­хузвай махсус серенжемдин манадикай, кье­тIенвилерикай лагьана. США-дин ва Рагъ­акIи­дай патан уьлквейрин гъуьнтIуьник акатнавай Украинадин кьилевайбуру чпин халкь маса гунал бес тахьана, урус халкьдиз, вири Россиядиз душманвал ийизва. Йисаралди Донбассдин агьалияр къирмишдай сиясатдиз къуват гана. Ибур эхиз жедай крар тушир­. Гьавиляй Россияди фашистриз элкъвенвай миллетчияр, неонацистар терг ийидай серенжемдик кьил кутуна. Ана чи халкьдин рухвайрини кьегьалвилелди иштиракзава.

А.Бабаеван классдин руководитель хьайи Индира Шидиевади  лагьана: “Алаудин пара къени хесетрин аял тир. Спортдал рикI алай ам азаддиз кьуршахар кьадай секциядиз физвай. Вичихъ галаз кIелзавайбуруз ада общественный крарани чешне къалурзавай. Россиядин Армиядин халис офицер хьунин къаст рикIе авай Алаудина Рязань шегьердин гьавадинни десантрин кьушунрин  институт куьтягьна. Ана исятда адан стха  Са­гидани кIелзава. Ахьтин кьегьал рухваяр тербияламишай диде-бубадиз баркалла!”

— Алаудин Бабаева  Ватандин вилик вичин буржи намуслувилелди кьилиз акъудна, зайифвилиз рехъ ганач, — лагьана райондин ветеранрин советдин председатель Ислеман Ризаева. — КIани руш аваз, гьайиф хьи, ам ме­хъерар ийизни агакьнач. Ихьтин кьегьалар чи жегьилриз гьар са карда чешне хьана кIанда.

Митингдилай гуьгъуьниз  Ватандин ЧIехи дяведа гъалибвал къазанмишна 77 йис тамам хьуниз бахшнавай Вирироссиядин “Гъалибвал” тIвар алай военно-спортивный  ватанпересвилин къугъунрин сергьятра аваз райондин школайрин арада акъажунар кьиле фена. Абур ЦIийи­хуьруьн юкьван школадин муаллим, запасда авай капитан Фейрудин Гьажимусаева ачухна. Акъажунар кьиле тухуз адаз запасда авай офицерри — Халилбег Халилбего­ва, Расул Бабаева, Агьмед Шихбабаева куьмек гана. Акъа­жунра  гадайри ва рушари иштиракна.

Пуд паюникай (строевая подготовка, автоматар чукIурна кIватI хъувун, винтовкадай лишанар ягъун ва эстафета) ибарат тир  акъа­жунрин нетижада 1-чка ЦIийихуьруьн юкьван­ школадин, 2-чка  Кьулан СтIалрин ва 3-чкани­ Вини СтIалрин юкьван школадин командайри кьуна.

Масуб Магьмудов