12-апрелдиз Дагъустан Республикадин Кьил Сергей Меликова региондин коронавирусдин тIугъвалдихъ галаз женг чIугвазвай оперативный штабдин заседание кьиле тухвана. Идан гьакъиндай “Лезги газетдиз” РД-дин Кьилин пресс-къуллугъди хабар гана.
Республикадин регьберди лагьайвал, санлай къачурла, алатай варцара кьабулай серенжемар себеб яз, гьалар умуд кутадайбур я. Гьа са вахтунда къейд авун лазим я хьи, хаталувал алатнавач. Пешекарри дуьньяда инсанар вирусдин цIийи штаммри, гьа жергедай яз “стелс-омикрон” генотипди арадал гъизвай инфекциядик начагъ хьунин ругуд лагьай лепе пайда хьун мумкин тирвиликай лугьузва. Генатип тIвар алай цIийи штамм майдандиз акъатнава. Алай вахтунда Китайда гзаф кьадар инсанар вирусдик начагъ жезва. Ана са шумуд шегьерда ва вилаятда карантин малумарнава.
Сергей Меликова къейд авуна хьи, агьалийриз медицинадин рекьяй пландин бинедаллаз куьмек гунихъ галаз сад хьиз, коронавирусдик начагъ жезвайбур кьабулдай алава чкаярни хвена кIанда. Вучиз лагьайтIа, вилик сив хуьнин ва Гъалибвилин суварар ква.
Агьалияр азардикай хуьн патал гьар са чкада профилактикадин серенжемрал амална кIанда. Абурукайни кар алайди ковиддиз акси рапар ягъун я. Заседанидал малумарайвал, 12-апрелдалди республикада 1337656 касдиз рапар янава. Ида вакцинация авунвайбурун 74,3 процент тешкилзава.
Дагъустан Республикадин Гьукуматдин Председателдин заместитель Мурад Къазиева хабар гайивал, къенин юкъуз республикада вакцинадин 116 агъзур доза ава. Регионда тIугъвалдиз акси коллективный иммунитет арадал гъун патал агьалияр вакцинация ийидай 89 пунктуни кIвалахзава. Ибурулай гъейри, мобильный 59 пункт ва мобильный 187 бригадани ава. Гьа са вахтунда пешекарри агьалийрин арада гъавурдик кутунин кIвалахни тухузва. Дагълух хуьрериз агьалияр вакцинация авун патал махсус бригадаяр физва.
Коронавирусдин тIугъвалдиз ва садакай масадак акатдай азарриз талукь яз республикада авай гьалдикай Роспотребнадзордин региондин регьбер Николай Павлова ва здравоохраненидин министр Татьяна Беляевади лагьана.
Роспотребнадзордин делилралди, къенин йикъалди республикада коронавирусдик 92550 кас начагъ хьана, 11-апрелдиз лагьайтIа, — 17 кас.
“Регионда, тIугъвалдиз акси яз тухузвай серенжемар себеб яз, са бязи сергьятвилер, къадагъаяр тунватIани, начагъ жезвайбурун кьадарди 0,5 процент тешкилзава. И жигьетдай Россиядин юкьван делил 8,1 процент я. Гьа са вахтунда, дуьньядин майданда цIийи штаммар гегьенш жезвайди фикирда кьуна, кьабулзавай серенжемар чна инлай кьулухъни давамарун герек я. Дуьньяда инсанар начагъ тахьун патал агьалийрин 70 процентди рапар яна кIанзава. ТахьайтIа, начагъ хьунин вилик пад кьаз жедач”, — лагьана Николай Павлова.
Ада вичин гафар тестикьарзавай мисални гъана. Къенин юкъуз Дагъустандин 16 мулкуна начагъ жезвайбур авач. Анра агьалийрин лап чIехи паюни вирусдиз акси рапар янава.
Н.Павлова вичин рахунрин эхирдай профилактикадин ва гзаф инсанар жезвай чкаяр дезинфекция авуниз талукь серенжемар давамарна кIанзавайди къейдна.
— Исятда республикадин медицинадин 3 идарада начагъбур патал 118 чарпай ава. ГьакIни алава 35 чарпайни гьазурнава, — лагьана Т.Беляевади. — Алай вахтунда больницайра вирусдик начагъ 86 кас сагъарзава. 11 касдихъ реанимациядин отделенида гелкъвезва. Кислороддин куьмек 29 касдиз гузва. Идахъ галаз сад хьиз, гьукуматдин тапшуругъдалди чара авунвай дарманар, рапар медицинадин идарайрив агакьарнава, абурукай кьитвал авач. ГьакI лазим чкаяр дезинфекция ийидай такьатарни ва маса шейэрни бес кьадарда ава. Москвадин здравоохраненидин департаментди рекье тур вирусдикай хуьдай 10 агъзур костюмни медицинадин идарайриз пайнава.
Вакцинациядин месэладал хтуналди, РД-дин Кьил Сергей Меликова агьалийриз вирусдиз акси рапар ягъунай хъсан кIвалах тухвай Хив, Гумбет, Гергебиль, Докъузпара, Сергокъала, Кьурагь районар ва Къизилюрт шегьер къейдна.
“Чи вилик суварарни ква,- лагьана региондин Кьили, — Сив хуьнин, Гъалибвилин, Майдин. Анра гзаф инсанарни кIватI жеда. Гьавиляй начагъ хьунин вилик пад кьун патал маскаяр алукIна кIанда. Коллективный иммунитет арадал гъунин мураддалди рапар ягъун давамарун чарасуз я”.
«Лезги газет»
