Дагъустандин милли музыкадин “Макъам” ансамбль арадал атана цIинин гатуз 4 йис тамам жеда. Адан репертуардик, милли музыка хьиз, Дагъустандин алай аямдин композиторрин эсерарни ква. “Макъам” ансамблдилай гзаф концертар гуз алакьнава, милли музыкадал кьару тир неинки са чи республикадин агьалийрин рикIер шадарзава, гьакI адалай къецени вичикай датIана хабар гузва. РикIел хкин: ам Москвада, Нальчикда, Санкт-Петербургда, Сочида, Грозныйда ва маса шегьерра кьиле тухвай хейлин фестивалрин иштиракчи, гьакIни “Усадьба-Jazz” фестиваль-конкурсдин лауреат я. “Макъам” ансамблди “Дустар кIватIзава” фестивалдин сергьятра аваз Москвадин консерваторияда концерт гана ва икI мад…
Мукьвара ансамблдин художественный руководитель Шамиль Шерифалиева Казандин госконсерваторияди Волжский Булгарияди ислам дин кьабулна 1100 йис тамам хьуниз талукьарна кьиле тухвай мярекатра иштиракна. Ш.Шерифалиеван суьгьбетдай малум хьайивал, концерт Сайдашеван тIварунихъ галай концертрин чIехи залда хъсан тешкиллувал аваз кьиле фена. Аниз Мукьвал тир РагъэкъечIдай патай, Центральный Азиядай ва Россиядин регионрай, кьилди къачур-тIа, Дагъустан, Чечня, Кабардино-Балкария, Башкортостан, Татарстан, Кеферпатан Осетия-Алания республикайрай тир музыкадин коллективар мугьман хьанвай. Шамиль Шерифалиева Казандин консерваториядин “Татарика” оркестрдихъ галаз санал (шикилда) Мегьамед Гьуьсейнован “Лезги рапсодия” тамамарна.
Алай йисуз РФ-дин культурадин министерстводи, “Чун — Рос-сия” тIвар гана, федеральный программадин сергьятра аваз, гастролрин чIехи проект кьилиз акъудзава. ИкI, адан сергьятра аваз мартдин эхирра “Макъам” ансамбль “Зи Дагъустан” концертдин программа гваз Ярославль, Иваново ва Кострома шегьерра гастролра хьана. Шадвилелди мадни а кар къейд ийиз кIанзава хьи, ана чи республикадай иштиракзавайди анжах кьве коллектив, абурукай садни “Макъам” ансамбль (муькуьди — кьуьлерин “Лезгинка” ансамбль) тир.
— “Зи Дагъустан” концертрин программади, тIварцIяйни аквазвайвал, чи республикадин халкьарин жуьреба-жуьреди тир музыкадин алемдихъ галаз танишарна. Жуьреба-жуьре милли алатрал (тар, кобыз, чIагъан, курай, домбыра) тамамарай манияр кIватI хьанвайбуру иллаки хъсандиз кьабулна. Сир туш, тардин девлетлуди тир тембрди оркестрдихъ галаз санал хъсандиз ванзава. Симфониядин гьикьван эсерар кхьенва тардал тамамарун патал, им дуьшуьшдин кар туш. Адан кьетIен сесини гьар са эсердин колорит мадни артухарзава, — суьгьбетна Дагъустандин госфилармониядин, Дагъустандин халкьдин алатрин Госоркестрдин солист Шамиль Шерифалиева.
Гастролрин вахтунда вири концертар шегьеррин госфилармонийрин чIехи залра кьиле фена, гьар садни са сятдилай артух вахтунда давам хьана. ИкI, “Макъам” ансамблдин программадик, кьилди къачуртIа, “Аваррин муьгьуьббатдин макьам ва Хахетинский кьуьл”, “Чна датIана дагълариз ялзава” (лакрин), Мурад Кажлаеван (“Далалай”), Сергей Агъабабован (“Дагъдин рекьерай”) эсерар, гьелбетда, лезги попурри, Дагъустандин халкьдин манийрин попурри ва гзаф маса нумраяр квай.
Рагнеда Рамалданова
