16-мартдиз Ахцегьа, Аскар Сарыджадин тIварунихъ галай изобразительный искусстводин школадин залда, анин тежрибалу муаллим, художник — живописец, РД-дин культурадин лайихлу работник  Энвер  Билалович  Асалиеван  гъилин яратмишунрин “Къадим Ахцегь — хайи Ватан!” выставка ачухна­. Мярекатда и школадин, патав гвай аялрин яратмишунин кIвалин коллективри ва теклифнавай ксари иштиракна.

Выставка ачухунин мярекатдал тебрикдин келимаяр гваз изобразительный искусстводин школадин директор, машгьур художник, Россиядин художникрин ва дизайнеррин союзрин член, Дагъустандин ва Карачаево-Черкесиядин ла­йихлу художник Мегьамедзериф Гьажиев рахана.

— И выставка чна Энвер муаллимдин 70 йисан юбилейдиз бахшнава. 46 йисуз ина гьакъисагъвилелди кIвалахиз (адан уьмуьрдин юлдаш ва хвани художникар, чи школадин муаллимар я), вичин  алакьунар ва къуват хуьруьн ая­лар искусстводин алемдиз шерикзавай, жегьил педагогризни художникриз девлетлу тежриба гузвай ам тарифуниз ла­йихлу я. Энвер Билаловича чIехи гьарфунилай тир инсанвилин къилихралди, вини дережадин пешекарвилелди, вичин бажарагълу яратмишунралди, хсуси чешнедалди, акьалтзавай несил ватанпересвилин руьгьдаллаз тербияламишзава. Рангунин ширералди чIугуна, рамкайра туна,  выставкада эцигнавай 20 шикилдайни чавай художникдин халкьдин милли тарихдиз, культурадиз, архи­текту­ра­диз авай майилвал, кIанивал ачухдиз кьа­тIуз жезва. Вижевай май­дан  — зал ава, художе­ст­вен­ный яратмишунрин гьа ихьтин маналу выставкаяр ги­ла чна ина чи школадин амай муаллимризни, райондин гьевескар художникризни тешкилда, — къейдна директорди.

— Хъсан художникар коллективда арадал къвезва. Жуван яратмишунрин выставка ачухдай мумкинвал ва куьмек гунай заз чи школадин коллективдиз, директордиз, атанвай вири мугьманриз сагърай лугьуз кIанзава. За шикилрин выстав­каяр Махачкъалада ва масанрани ачухна. Амма жуван хайи ватанда, коллективда ихьтин кар тешкилун мадни хуш я. Халисан муаллимди, устIарди ученикар хсуси чешнедалди гъавурдик кутуна кIан­­да, — лагьана Энвер Билаловича.

Выставка апрелдин эхирдалди давам жеда. Райондин ва паталай къвезвай тамашачийри ам пара хушдиз кьабулзава.

Дашдемир Шерифалиев