Гьар йисуз мартдин вацран эхирра чи уьлкведа Культурадин работникдин югъ шад гьалара къейд авун адетдиз элкъвенва. Культура гьар са халкьдин тарих, адетар, чIал ва са жерге важиблу терефар къалурзавай хел я. И хилез кIвалахал дуьшуьшдин кас ваъ, вичихъ алакьунар, яратмишунин гьевес авайди къведа. Вичихъ винидихъ раханвай гьиссер авай, аял чIавалай культурадин макандин уьмуьрдал ашукь хьайи ва, чIехи хьайила, гьа пеше хкянавайбурукай сад Къазиханова Зайнаб Гьамидуллагьовна я.
Вич ашукь хьана хкянавай пешедиз къанни цIуд йисалай виниз вахтунда вафалувал хуьзвай, райцентрадин культурадин маканда кьиле физвай вири мярекатра иштиракзавай, хуьруьн, райондин уьмуьрдикай са юкъузни къерех тежезвай зегьметкеш инсандикай гьикI кхьидач?!
Зайнаб 1968-йисуз Магьарамдхуьре дидедиз хьана. Юкьван школа, гуьгъуьнлай алишверишдинни кулинариядин техникум, культпросветучилище акьалтIарна. Уьмуьрдин кьадар-кьисмет себеб яз, Зайнаб 1989-йисуз Кучун-Къазмайрин хуьруьз акъатна, ина хизан кутуна.
Гьеле аял вахтарилай, гьар жуьре кружокра вердишвилер къачунвай, райондин культурадин маканрин майданра вичин алакьунар къалурай Зайнаб гьамиша иштиракчийрин кIвенкIвечи жергейра хьана. Адаз, манияр лугьунилай гъейри, са жерге милли алатарна ягъиз чида. Вичин кIвалахдин рехъ Кучун-Къазмайрин культурадин кIвале художественный руководитель яз башламишна, гуьгъуьнлай МЦК-дин (межпоселенческий центр) заведующий хьана, къенин юкъузни гьакъисагъвилелди зегьмет чIугвазва. Ада регьбервал гузвай коллективди, кружокрин тербиячийри районда кьиле физвай вири мярекатра иштиракзава. Эхиримжи вахтара чи уьмуьрда кьетIен чка кьунвай соцсетрай аквазвайвал, Зайнаб Гьамидуллагьовнади са суварни ахъайзавач. Вири мярекатриз абурун сайтдилай килигиз жеда. Мярекатар хайи дидед чIалалди тухуни абурун менфятлувал мадни артухарзава. Лезги чIалал кIелзавай шиирар, чи ата-бубайрилай атанвай куьгьне манияр, адетриз талукь сегьнеяр, гьазурзавай тIямлу милли хуьрекар — вири акьалтзавай несил ватанпересвилин гьиссераллаз тербияламишунихъ, хайи чIал кIан хьунихъ, адетар, культура хуьнихъ элкъуьрнава. Ихьтин хуш рафтарвал хуьзвай чкада аялризни и мярекатра иштиракдай гьевес жезва.
Хъсан пешекар, гьуьрметлу хуьруьнви, хатурлу яр-дуст хьиз, ам играми дидени я. Ада къанун-къайда хуьдай органра кIвалахай вичин уьмуьрдин юлдашдихъ галаз пуд велед тербияламишна. Абурухъ гьар садахъ чпин пешеяр, хизанар ава. Зайнаб дидедиз абуру пуд хтулни багъишнава. Вич ашукь хьана хкягъай пешедиз вафалувал къалурунилай гъейри, ада хтул Эмилиядизни вичин гелерай фидайвал и хел кIанарнава.
Сивел мили хъвер алай, ширин мез, чина берекатдин нур авай и кас гьалтай гьар садан гуьгьуьлар ачух жеда. Зайнаб Гьамидуллагьовнадин зегьмет райондин руководстводин, культурадин управленидин гьуьрметдин грамотайралди лишанлу авунва.
Чна квез сифте нубатда пешекарвилин сувар рикIин сидкьидай мубаракзава! Чи уьмуьрдин важиблу культурадин хиле зегьмет чIугвазвай, халкьдиз шадвал багъишзавай куь хизандиз, куьне регьбервал гузвай коллективдиз къуй анжах хийирдин крар ва шад хабарар кьисмет хьурай, гьуьрметлу Зайнаб Гьамидуллагьовна!
А.Айдемирова
