28-апрелдиз Докъузпара районда гегьенш субботник кьиле фена. Экуьнилай эгечlна райондин центрада, хуьрера кардик квай жуьреба-жуьре тешкилатринни идарайрин къуллугъчияр, жергедин агьалияр гатфарин субботникдиз экъечlнавай. Адетдиз элкъвенвай и кьетlен серенжемдик вирибуру чпин пай кутаз алахъзава.

Райоцентрадин сергьятра кьиле фейи субботникда райондин кьил Абдурагьим Алискерова, адан заместителри, идарайрин жавабдар къуллугъчийри ва масабуру иштиракна. Райондин регьбер кьиле аваз, вирибуру дуствилелди гъиле перер, цуьруьгъуьлар ва маса хуьруьн майишатдин алатар гваз зегьмет чlугуна. Кьилди къачуртlа, вирида санал Гъалибвилин парк, идарайрин сергьятар зирзибилрикай михьна, тарар обрезка авуна, абуруз киреж ва цларизни жугъунриз ширер яна.

«Аквазвайвал, субботникда районэгьлийри хъсандиз иштиракзава. Са куьнизни килиг тавуна, хайи район гуьрчег ва абад авуниз, адан михьивал хуьниз кьетlен фикир гузва. И серенжемда иштиракзавай вирибуруз за рикlин сидкьидай сагърай лугьузва. Ихьтин месэлайриз датlана фикир гана кlанзава. Лугьудайвал, михьивал хуьзвай чкада михьи жеда», — къейдна Абдурагьим Алискерова.

Са рахунни алачиз, жемиятдин хушбахтвал ва хайи ерийрин абадвални михьивал патал тешкиллудаказ кьиле тухузвай субботникдихъ кьетlен метлеб ава. Бигердин кlвалахдин нетижада центрадин мулкарин мешреблувални михьивал артух хьана.

Куругъли Ферзалиев