Къенин чи ихтилат халкьдин милли меденият машгьурзавай Гуьлогълан Садединович Мамедяровакай я. Ам 1973-йисан 19-мартдиз Ахцегь райондин Фиярин хуьре колхозчидин хизанда дидедиз хьана. 1990-йисуз мектеб куьтягьна.
1993-йисалди Ростов шегьерда жуьреба-жуьре кlвалахарна. Чирвилерихъ ялзавай жегьил 1992-йисуз Махачкъалада кардик квай управленидинни бизнесдин институтдин заочный отделенидик экечlна. Кlелни ийиз ада Фиярин хуьруьн ктабханадин заведующийвиле кlвалахна. Медениятдиз, яратмишунриз майилвалзавай жегьил 1998-йисуз Махачкъаладиз куьч хьана. Ина ада 1999-йисуз халкьдин художественный пешедин затlар арадал гъидай цех ачухна.
Бажарагълубур вири рекьерай бажарагълу жеда лугьудайвал, Г.Мамедяровни са шумуд терефдихъай алакьунар авай кас я. Россиядин журналистрин Союздин член тир ада 2003-йисалай “Кьиблепатан часпар” газетдихъ галаз сих алакъаяр хуьз хьана. Яратмишунин рекье зегьмет чlугвазвай ватанпересдин къелемдикай 2014-йисуз Фиярин хуьруьн тарихдикай сифте ктаб хкатна.
2015-йисуз халкьдин художественный кеспидин затlар арадал гъунин карда вичин кьетlен тежриба хьайи Гуьлогълана и хел федеральный ва дуьньядин дережада вилик тухун патал “Кавказдин бажарагълубур” тlвар алай чlехи проект тешкилна. 2016-йисуз Москвадин миллетрин кlвале ва РД-дин гьамишалугъ векилханада Г.Мамедярова хайи хуьруькай кхьей ктабдин презентация кьиле фена. Гьа йисалай ам вири халкьарин журналистрин кlватlалдин, Дагъустандин ватанэгьлийрин клубдин член, РФ-дин Президентдин патав гвай Дагъустандин гьамишалугъ векилханадин Общественный советдин член я.
Лезгийриз ва Дагъустандиз талукь яз Москвада кьиле физвай вири мярекатра чи ватанэгьлиди иштиракзава. Ам 2016-йисалай Москвада авай “Дагъустан” тlвар алай медениятдин макандин президиумдин векилрикай сад я.
РФ-дин Госдумада Общественный палатада, РД-дин векилханада, ВДНХ-да, Москвада авай миллетрин кlвале кьиле физвай выставкайра, медениятдин, гьа жергедай яз, меркезда гьар йисуз кьиле физвай Яран суварин мярекатрани чи ватанэгьлиди активдаказ иштиракзава.
Вичин асул кlвалах, майилвал лезгийрин, санлай Дагъустандин меденият вилик тухунихъ галаз алакъалу Гуьлогълан Мамедяров гзаф кьадар дипломрин, грамотайрин ва маса шабагьрин сагьиб я. Ам и рекье къазанмишнавай агалкьунрал сергьятламиш хьана акъваззавач. Къуй адахъ мадни чlехи агалкьунар хьурай!
«Лезги Газет»
