Ахцегь райондин УОС-дин руководстводи чпин балансдал алай Гуьней патан дигидай къанал сезондиз гьазурунин мураддалди ахтармишна ва ам михьунин кIвалахрин график туькIуьрна. И мукьвара чун къанал гьихьтин гьалда аватIа килигна. Ам михьунин кIвалахрал УОС-дин инженер Равил Гьамзаева гуьзчивалзава. Ада лугьузвайвал, Ахцегьрин Гуьней патан агьалийрин багълар, никIер дигидай къаналдин кьил вацIу тухунин хаталувал арадал атанва (шикилда).
Виликдай Къурукаларин хуьруьн мукьувай кьере габиондин цал эцигнай. Алай вахтунда ам вацIу тухванва. ВацIа яд пара тахьанмаз, цал тади гьалда эхцигун чарасуз я. Эгер и кар тавуртIа, Гуьней патан агьалияр дигидай цикай магьрум жеда. Амма кIвалах башламишун патал пулдин такьатар авач…
И йикъара къанал 3 километрдин мензилда къайдадиз хканва. Ам чарасуз чкайрилай гегьеншарзава, кул-кусрикай михьзава, ремонтзава. Лай участокда къанал михьунин кIвалахра бульдозерист Фарман Шефиева, кавча галай трактор гвай Мегьамед Межидова, рабочияр тир Медияр Мамедьярова, Азиз Эскендерова ва масабуру ашкъидалди иштиракзава.
Къейд авун лазим я хьи, и къаналдин амай участокар михьун вичиз талукь тир “Сельсовет Ахтынский” СП-дин руководстводи гьелелиг тади къачузвач… Идан себеб вуч ятIа?
Рагьидин ЭМИНОВ
