Стамбулда кьиле фейи рахунар
Украинада арадал атанвай гьалар къайдадик кутунин жигьетдай 29-мартдиз Россиядин Федерациядин ва Украинадин векилрин арада нубатдин рахунар Туьркиядин Стамбул шегьердин Долмабахче дараматда кьиле фена. Россиядин дестедин кьиле Президент В.Путинан куьмекчи В.Мединский, Украинадин дестедин кьиле а уьлкведин президентдин офисдин кьилин меслятчи М.Подоляк авай.
Пуд сятда кьван давам хьайи гуьруьш акьалтIайдалай кьулухъ Владимир Мединскийди къейд авурвал, кьиле тухвай рахунар метлеблубур хьана. Адан фикирар “Новости” РИА-ди раижна.
Малумарайвал, Москвадихъ галаз икьрар кутIунайдалай кьулухъ Киев военный кIватIалрик экечIуникай къерех жеда. “Украинади военный союзрик экечIуник, уьлкведин мулкарал къецепатан военный базаяр эцигуник, заминвал гузвай государствойрин, гьа жергедай яз Россиядинни, разивал авачиз военный вердишвилерин серенжемар кьиле тухуник кьил кутадач”, — лагьана Россиядин регьбердин куьмекчи В.Мединскийди. Гьа са вахтунда ада алава хъувурвал, Евросоюздик экечIун патал Украинади ийизвай алахъунриз Москвади аксивал ийидач.
Мединскийдин гафаралди, Украинадин терефди хиве кьунва хьи, женгинин серенжемар тухуналди Крым ва Донбасс вахчунин алахъунар ийидач.
Къейд ийин, Донбассда махсус серенжем тухунин гьакъиндай РФ-дин Президент В.Путина 24-февралдиз малумарнай. Адан макьсад Донбассдин агьалияр миллетбазрикай хуьн я.
30-мартдиз РФ-дин оборонадин министерстводи малумарайвал, махсус серенжем кьиле тухунив эгечIайдалай инихъ чи кьушунри Украинадин 124 самолет ва 77 вертолет, зенитный ракетайрин 214 комплекс, пилот галачир 321 аппарат, 1752 танк ва дяведин маса машинар, РСЗО-дин 184 установка, артиллериядин ва маса 734 яракь, дяведин суьрсет, военный махсус 1640 автомобиль тергна.
“Гьакъи гудач — газни жедач”
23-мартдиз РФ-дин регьбер В.Путина Европадиз агакьарзавай газдин гьакъи урус пулуналди кьилиз акъуддайвал авунал элячIун тапшурмишна. Ада къейд авурвал, доллардини евроди чпин дережадиз зарар гана.
Эхиримжи йикъара Европадин бязи уьлквейри газдин гьахъ-гьисаб урус манатралди авуник чпи кьил кутадач лагьана.
РФ-дин Президентдин пресс-секретарь Д.Пескова урус пулуналди газдин гьакъи гуз кIан тийизвай ЕС “гьакъи гудач — газни жедач” гафаралди тагькимарна. Идан гьакъиндай ада PBS телеканалдиз гайи интервьюда къейдна. Пескова алава хъувуна хьи, Европадин бязи уьлквейри, США-ди, Канадади ва Австралияди алишверишдани экономикада Россиядиз акси дяве малумарнава.
30-мартдиз Госдумадин Председатель В. Володина вичин Telegram-каналда къейд авурвал, Европадин государствойрихъ газдин гьакъи манатралди гудай базардин вири мумкинвилер ава. “Ина са мусибатни авач. Пул аваз, амма метягь авачиз хьун я лап чIуру гьал… Эгер газ агакьна кIанзаватIа, манатарни жагъура. МасакIа виже къведач”, — кхьена В.Володина.
ЧIалахъ жезвач
ДНР-дин кьил Д.Пушилина, Стамбулда кьиле фейи рахунриз талукь яз баян гудайла, къейдна хьи, Украинадин терефди лугьузвай гафарин чIалахъ хьана виже къведач. Адан гафар “Новости” РИА-ди раижна.
“Украинадихъ галаз рахунар кьиле тухунин жигьетдай чахъ ирид йисан тежриба ава. Гьатта са квел ятIа къулар чIугурдалай кьулухъни Украинадин терефдин чIалахъ хьана кIандач… Украина икьрардал текъведай, вич вичин ихтиярда авачир уьлкве я”, — лагьана ДНР-дин регьберди.
ЕС-диз меслят кIанзавач
Госдумадин хатасузвилин ва коррупциядиз аксивалунин комитетдин векил А.Шхагошеван фикирдалди, ЕС-диз Москвадинни Киевдин арада кьиле физвай рахунра меслятдал атунин агалкьунар хьана кIанзавач. Адан гафар 29-мартдиз “Новости” РИА-ди раижна.
Къейдзавайвал, Европадин са жерге уьлквейри анрай Россиядин дипломатар рахкуруни ЕС-диз Москвадинни Киевдин арада къалмакъал акъвазаруниз талукь менфятлу рахунар кьиле фена кIанзавачирвилин гьакъиндай шагьидвалзава.
Россиядинни Украинадин векилрин арада рахунар кьиле фейи 29-мартдиз Нидерландрай, Бельгиядай, Ирландиядай ва Чехиядай анин гьукумдарри Россиядин дипломатар рахкурзавайдакай хабар ганай.
Байден кумукьдай
Эгер алай вахтунда США-дин президентдин сечкияр кьиле фейитIа, Байден Трампаз кумукьдай. Америкадин чешмейрал асаслу яз, идакай В.Соловьеван Telegram-каналди хабар гузва.
Агьалийривай хабарар кьун патал тухвай серенжемдин нетижада малум хьанвайвал, виликан президентдиз сес гуз гьазурбурун кьадарди 47 процент, Байденаз сес гуда лагьай агьалийри 41 процент тешкилзава.
«Лезги газет»
