28-мартдиз Дагъустандин Кьил Сергей Меликова “Почта России” АО-дин “Кеферпатан Кавказ” макрорегиондин директор Максим Ткаченкодихъ галаз гуьруьш кьиле тухвана. Абуру 2025-йисалди почтадин алакъадин хуьруьн чкада авай отделенияр цIийикIа туькIуьр хъувунин жигьетдай РФ-дин Президентди ганвай тапшуругъдиз талукь месэлаяр веревирдна.
Алай вахтунда Дагъустанда почтадин алакъадин 570 отделение ава. Абурукай 315 цIийикIа туькIуьр хъувун патал кардик кутунвай программадик акатнава. М.Ткаченкодин гафаралди, гъилевай йисуз республикада 63 отделенидин дараматар къайдадиз хкида, абурукай 2 модульный отделенийралди эвезда.
М.Ткаченкоди мадни къейд авурвал, “Почта России” АО-ди Дагъустандин гьукумдин органрихъ галаз сих алакъада аваз кIвалахзава. Жуьреба-жуьре месэлаяр гьялунин карда куьмекар гунай ада республикадин руководстводиз сагърай лагьана.
“Почта России” АО стратегиядин метлеб авай чIехи карханайрикай сад я. Алай вахтунда ана 310 агъзур касди кIвалахзава.
Гуьруьшда гьакIни РД-дин вице-премьер Ризван Гъазимегьамедова, рекъемрин рекьяй вилик финин министр Юрий Гьамзатова, “Почта России” АО-дин Дагъустанда авай Управленидин кьил Махач Мегьамедова иштиракна.
Чи мухбир
