28-мартдиз Кьурагь райондин КIирийрин школа-интернатда Советрин Союздин Игит Эсед Салигьован экуь къаматдиз бахшна волейболдай итимрин арада республикадин дережадин 50-турнир кьиле фена. Ана иштиракай мугьманри ва иштиракчийри къейд авурвал, турнир вини дережада аваз тешкилнавай.
Къизгъиндаказ кьиле фейи къугъунриз килигиз Дагъустандин жуьреба-жуьре пипIерай атанвай тамашачийрин кьадарни гзаф тир. Хала-хатурвилиз рехъ тагунин мураддалди Махачкъаладай республикадин категориядин судья Къурамегьамед Къурамегьамедоваз эвернавай. Нянрихъ гъалибчи командаяр тайин хьана. ИкI, Э.Салигьован Кубок Хунзах райондин командади къазанмишна. 2, 3 ва 4-чкаяр, талукь тирвал, Шамил, Кьурагь ва Унцукул районрин хкянавай командайри кьуна.
Гъалиб хьайи командайрив шабагьар вахкуниз талукь шад мярекатдал игитдин кьегьалвиликай хьиз, спортдин важиблувиликайни райондин кьил Замир Азизов рахана. Шабагьар администрациядин физический культурадин ва жегьилрин крарин рекьяй отделдин начальник Рамиз Рамазанова вахкана. Турнирда иштиракай вири командайриз медалар, грамотаяр ва спортдал машгъул хьун патал лазим затIар, тафаватлу хьайи 7 волейболистдиз ва тамашачийризни махсус пишкешар гана. Судьяйрин кIвалахни къейд тавуна тунач.
«Лезги газет»
