Са тIимил йикъар идалай вилик Урусатдин Владимирский областдин Суздаль шегьерда каратэдин пуд жуьредай («ограниченный контакт», «полный контакт», «полный контакт в средствах защиты») дуьньядин чемпионат кьиле фена. Ана, Россиядилай гъейри, дуьньядин 7 уьлкведай, гьа гьисабдай яз Камерундай, Анголадай, Кубадай, Латвиядай, Белоруссиядай, Тажикистандай, Узбекистандай тир 250-далай виниз пагьливанри чпин устадвал къалурна. Командайрин арада чи уьлкве 1-чкадиз лайихлу хьана. 2 ва 3-чкаяр Белоруссиядин ва Тажикистандин хкянавай командайри кьуна…
Тешкилатчийри къейдзавайвал, сифтедай и чемпионатда иштиракиз кIанзавай спортсменрин кьадар 1000-далайни виниз тир, амма политикадин са акьван хъсанбур тушир гьалар себеб яз, гзафбурувай чи уьлкведиз къвез хьанач. РикIел хкин: каратэдин пуд жуьредай дуьньядин чемпионат тарихда кьвед лагьай сеферда кьиле тухузва. Сад лагьай чемпионат пуд йис идалай вилик Москвада хьанай.
Дуьньядин чемпионатда Дагъустандин хкянавай командадик кваз иштиракай 5 спортсмендикай кьведа медалар къазанмишна. Амма виридалайни гзаф медалар къазанмишай регионрин арада Ульяновскдин область ава. ИкI, ана иштиракай вири 25 спортсменни, жуьреба-жуьре чкаяр кьуналди, тафаватлу хьана. Шадвилелди къейд ийиз кIанзавай кар мадни ам я хьи, и областдин патай дуьньядин чемпионатда вичин ери-бине Кьурагь райондин КIирийрин хуьряй тир, алай вахтунда Ульяновскдин областда яшамиш жезвай ва и региондин патай экъечIзавай Сократ Гьажиева (64 кг-дал къведалди заланвал авай итимрин арада) 3-чка кьуна. Спортдин рекье агалкьунар адахъ идалай виликни са шумудра хьана. ИкI, алатай йисан сентябрдиз Краснодарский крайдин Витязево поселокда каратэдай кьиле фейи Россиядин чемпионатда (ана чи уьлкведин 51 региондай тир 330-дав агакьна спортсменри чпин устадвал къалурна) 1-чка кьуналди, чи ватанэгьлиди каратэдай спортдин мастервилин тIварни къазанмишна. Чаз чир хьайивал, ада Россиядин УФСИН-дин Ульяновскдин областда авай 1-СИЗО-да режимдин ва надзордин отделдин инспектор яз кIвалахзава. Чи мурад адахъ инлай кьулухъни гьам спортда, гьамни уьмуьрда мадни еке агалкьунар хьун я.
Рагнеда Рамалданова
