И мукьвара Свердловскдин областдин Верхняя Пышма шегьерда женгинин ва спортдин самбойрай Россиядин чемпионат кьиле фена. Спортдин самбодай тухвай акъажунра 88 кг-дал къведалди заланвиляй майдандиз ери-бине СтIал Сулейманан райондин Алидхуьрелай тир Россиядин спортдин мастер Аслан Къурбанов (шикилда эрчIи патахъай кьвед лагьайди) экъечIна.
88 кг-дал къведалди заланвиляй 50-дав агакьна спортсменрин арада къизгъин бягьсер кьиле фена. ИкI, 4 юкъуз давам хьайи акъажунра Аслан Къурбанова 5 касдал гъалибвал къачуна. Амма, гьайиф хьи, финалдиз акъатун патал кьиле фейи бягьсина Аслан самбодай пуд сеферда дуьньядин чемпион Сергей Кирюхиназ са баллдин тафават аваз кумукьна. Нетижада А.Къурбанова чемпионатда 3-приздин чка кьуна. Ам Дагъустандин спортсменрикай приздин чкадиз лайихлу хьайи са кас я.
Россиядин чемпионатдин нетижайриз килигна, ана 1 ва 2-чкаяр кьур спортсменри Европадин ва дуьньядин чемпионатра, Аслан Къурбанова международный турнирда иштиракда.
Къейд авун лазим я хьи, Россиядин самбодин федерациядин президент Елисеева чи районэгьли Аслан Къурбанован устадвилиз еке къимет гана, адан тIвар Россиядин машгьур самбистрихъ галаз санал кьуна. Аслан Къурбанова вичин дах, самбодайни дзюдодай спортдин мастер, Россиядин лайихлу тренер Юрий Къурбанован рехъ уьзягъдаказ давамарзава. Аферин!
Хазран Кьасумов
