20-мартдиз СтIал Сулейманан райондин Эминхуьруьн юкьван мектебда лезги чIа-лайни эдебиятдай кьиле фейи олимпиадада республикадин 7 райондай 11-классра кIелзавай 47 аялди иштиракна. Абурун арада СтIал Сулейманан (22), Кьурагь, Мегьарамдхуьруьн, Хив (гьар санай — 6), Докъузпара (3) ва Дербент, Хасавюрт (гьар са- най — 2) районар авай. Мярекатда иштиракун патал Ахцегь, Рутул районрин, Дербент, Дагъустандин Огни шегьеррин администрацийрин образованидин управленийризни теклифдин чарар рекье тунвайтIани, анрай са касни атанвачир. Гьар йисуз кьиле тухузвай олимпиада СтIал Сулейманан райондин администрациядин куьмекдалди тешкилнавайбур “Лезги газетдин” редакцияни мергьяматлувилин “ЛЕКИ” фонд тир.
Мярекатдин гьуьрметлу мугьманрин арада СтIал Сулейманан райондин кьил Нариман Абдулмуталибов, “ЛГ”-дин кьилин редактор Мегьамед Ибрагьимов, адан заместитель Куругъли Ферзалиев, “ЛЕКИ” фондунин генеральный директор Гьасан Гьасанов, “Этнокультура” хилез регьбервал гузвай Руслан Мегьдиханов, фондунин проектрин менеджер Раиса Жалилова, крар идара ийизвай директор Закир Къагьриманов, Краснодардай хтанвай ватанэгьлияр — Максим Садикьовни Гамлет Алибегов, РД-дин писателрин Союздин лезги секциядин руководитель Владик Батманов, гьикаятчи, филологиядин илимрин кандидат Сардар Абил, дуьньядин чемпион Велимурад Алхасов, “Лезги ким” проектдин регьбер Имран Гьуьсейнов, районрин администрацийрин образованидин управленийрин начальникар, лезги чIалан муаллимар ва масабур авай.
Олимпиада гатIундалди вилик Эминхуьруьн юкьван мектебдин директор Рагьман Османова мугьманар тебрикна, мярекатдихъ хайи чIал хуьнин жигьетдай авай важиблувал къейдна, иштиракчийрихъ агалкьунар хьун алхишна.
Гуьгъуьнлай олимпиададин шартIарикай М.Ибрагьимова, Гь.Гьасанова ва Р.Мегьдиханова ихтилатна. Абуру кьвед лагьай сеферда тухузвай и мярекат, виликанди хьиз, ачухдиз, яни чирхчиррин, мукьва-кьиливилин алакъайриз килиг тавуна, гьар са аялдин кIвалахдиз лайихлу къимет гуналди кьиле фидайди къейдна.
Иштиракчияр 4 дестедиз пайнавай. Абуру лезги чIалайни эдебиятдай тестрин жуьреда туькIуьрнавай тапшуругъар, синтаксисдин, морфемайрин разборар, тестдин жуьредин диктант тамамарна. Аялри кIвалахар тамамарзавай чIавуз СтIал Сулейманан райондин кьил Нариман Абдулмуталибов олимпиада кьиле физвай гьаларихъ галаз таниш хьана, вини дережада аваз тешкилунай “Лезги газетдин” редакциядинни “ЛЕКИ” фондунин векилриз сагърай лагьана.
Жюридик Куругъли Ферзалиев (председатель), Мегьамед Ибрагьимов ва Раиса Жалилова квай. КIвалахриз къимет баллрин къайдада гана. Иштиракчидивай къачуз жезвай баллрин вини кьадар 70 тир.
Гъалибчияр патал 10 чка тайинарнавай. Нетижада и чкайриз агъадихъ галайбур лайихлу хьана:
1-чка — СтIал Сулейманан райондин Испикрин хуьруьн мектебдин ученица Карина Алимурадова (62 балл, пулдин пишкеш — 25 агъзур манат);
2-чка — СтIал Сулейманан райондин Вини СтIалрин мектебдин ученица Зилефат Мегьамедова (60 балл, 20 агъзур манат);
3-чка — СтIал Сулейманан райондин Агъа СтIалрин мектебдин ученица Залина Шихнебиева (57 балл, 15 агъзур манат);
4-чка — Мегьарамдхуьруьн райондин Хожа-Къазмайрин мектебдин ученик Шамил Алхасов (52 балл, 12 агъзур манат);
5-чка — СтIал Сулейманан райондин Агъа СтIал-Къазмайрин мектебдин ученица Алина Асланова (51 балл, 10 агъзур манат);
6-чка — Мегьарамдхуьруьн райондин Филерин хуьруьн мектебдин ученица Халумагъа Муслимова (8 агъзур манат);
7-чка — СтIал Сулейманан райондин Шихидхуьруьн мектебдин ученица Амина Ибрагьимова (6 агъзур манат);
8-чка — Хив райондин Цналрин хуьруьн мектебдин ученик Абдул Рамазанов (4 агъзур манат);
9-чка — Кьурагь райондин КIирийрин хуьруьн РФ-дин Игит З.Батманован тIварунихъ галай школа-интернатдин ученица Мерихан Фатагьова (3 агъзур манат);
10-чка — СтIал Сулейманан райондин ЦIийихуьруьн мектебдин ученик Мегьамед Аллагькъулиев (2 агъзур манат).
Пулдин пишкешрилай гъейри, кIвенкIвечи чкаяр кьур аялриз тешкилатчийрин патай дипломар, иердиз туькIуьрнавай чIаварганар (календарь) ва “Пак Къуръан ва адан манайрин таржума лезги чIалал” (таржумачи — диндин алим Ямин Мегьамедов) ва “Пайгъамбардин уьмуьрдин рехъ” ктабар гана. 1-5-чкаяр кьур аялрин муаллимрив — 3 агъзур, 6-10-чкаяр кьур аялрин муаллимрив 2 агъзур манатдин кьадарда аваз пулдин премиярни гьуьрметдин грамотаяр вахкана.
Олимпиададин кьилин савкьат — принтер (ам маса къачун патал РФ-дин Президентдин патав гвай РД -дин Гьамишалугъ Векилханадин Общественный Советдин член, “Лезги газетдин” редакциядин амадаг Мурад Мегьамедкеримова 18 агъзур манат чара авунвай) 1-чка кьур Карина Алимурадовадиз гана.
Мярекатдин сергьятра аваз лезги писателрин Союзди (председатель — Сардар Абил) иштиракчийрин арада лезги чIалал хъсандиз шиирар кIелунай конкурс кьиле тухвана ва гъалиб хьайи пуд аялдив Союздин патай дипломар вахкана.
М.Ибрагьимова олимпиада тешкилиз куьмек гунай Эминхуьруьн юкьван мектебдин директор Рагьман Османован, кIелунрин рекьяй адан заместитель Румина Рамазановадин ва и мектебдин лезги чIалан муаллим Жамилия Жигеровадин зегьмет “Лезги газетдин” редакциядин патай гьуьрметдин грамотаяр гуналди къейдна. Ада гьакIни лезги чIал хуьник ва вилик тухуник кьетIен пай кутунай “ЛЕКИ” фондунин “Этнокультура” хилез регьбервал гузвай Руслан Мегьдихановазни Хасавюрт райондин ЦIийи Къурушрин хуьруьн 1-нумрадин мектебдин муаллим Гьажи Къазиеваз “Лезги газет” — 100 йис” медалар гана.
“ЛЕКИ” фондунин патай Р.Мегьдиханова гьуьрметдин грамотаяр Нариман Абдулмуталибовав, Рагьман Османовав, Мегьамед Ибрагьимовав, Куругъли Ферзалиевав ва меценат Шагьпаз Асахановав вахкана.
Мярекатдин эхирдай са кьадар мугьманри — Шамсудин Магьамдарова, Фикрет Агьмедова, Гьажи Къазиева, Максим Садикьова, Закир Къагьриманова, Имран Гьуьсейнова ва масабуру Эминхуьре лезги чIалай кьиле тухванвай олимпиада гьакъикъатдани лишанлу вакъиа — лезги чIалан сувар хьайиди, адахъ акьалтзавай несилар хайи чIал мадни дериндай чирунал желб авунин карда еке метлеб авайди къейдна.
Олимпиададиз атанвай вири мугьманриз, иштиракчийриз мектебдин столовойда суфраяр ачухнавай.
РикIел хкин, “Лезги газетдин” редакциядини “ЛЕКИ” фондуни лезги чIалай тешкилнавай сад лагьай олимпиада алатай йисуз кьиле фенай. Ана республикадин 9 муниципалитетдай 52 аялди иштиракнай.
Агьмед Магьмудов
