Украинада махсус серенжем
23-мартдиз РФ-дин оборонадин министерстводи хабар гайивал, махсус серенжем гатIунайдалай инихъ чи уьлкведин кьушунри Украинадин 184 самолетни вертолет, пилот галачир 246 аппарат, зенитный ракетайрин 189 комплекс, 1558 танк ва дяведин маса машинар, РСЗО-дин 156 установка, артиллериядин ва маса 624 яракь, дяведин суьрсет тергна.
ООН-да Россиядин гьамишалугъ векилдин сад лагьай заместитель Д.Полянскийди хабар гайивал, Украинадин аскерри, химиядин затIар ишлемишуналди, гъулгъула тунин гьазурвал аквазва. Адан гафар “Новости” РИА-ди раижнава.
“Украинадин миллетбазрин кIеретIри чпин гуьзчивилик квай мулкара химиядин зегьерлу затIар ишлемишуналди гъулгъула тунин патахъай гьазурвилер аквазвайдакай чна виликамаз аннамишай крар, гьайиф хьи, гьакъикъатдиз элкъвезва”, — лагьана Д.Полянскийди.
Кьилди къачуртIа, Украинадин аскерри Николаевский райондин Котлярово хуьруьн мектебдин дараматдиз зегьерлу затIар авай контейнерар тухвайдакай Россиядин терефди РагъакIидай патан уьлквейриз виликамаз малумарнай.
Идалай вилик хабар гайивал, Украинадин мулкара химикатар ишлемишунихъ галаз алакъалу агьвалатдин месэладай ООН-дин Хатасузвилин Советди кьил акъудун кьетIнава.
Украинадин яракьлу къуватри (ВСУ) химикатар ишлемишуниз гьазурвал аквазвайдакай 19-мартдиз РФ-дин оборонадин управленидин милли центрадин начальник, генерал-полковник М. Мизинцева малумарнай.
Германиядин канцлер О. Шольца къейднавайвал, РагъакIидай пата Россиядиз акси яз кардик кутунвай санкцийри чпиз гудай зиянарни фикирда кьун чарасуз я.
ДНР-дин оборонадин штабди 23-мартдиз хабар гайивал, эхиримжи суткада Украинадин кьушунри цIай гуникди республикадин ислягь 28 касдал хирер хьана.
Британиядин “The lndependent” чешмеди хабар гузвайвал, Россиядиз акси яз малумарнавай санкцияр Великобританиядиз багьаз акъвазда. Нетижада гзафни-гзаф кесибриз зиянар жеда. Идакай В.Соловьеван Telegram-каналди хабар гузва.
Ветерандин дережа гуда
Украинада ва Донбассда махсус серенжемда иштиракзавайбур женгерин гьерекатрин ветеранар яз гьисабунин гьакъиндай Госдумадиз “Сад тир Россия” партиядин депутатри законопроект теклифнай. “Новости” РИА-да хабар гузвайвал, 23-мартдиз Госдумади закон рейсадвилелди кьабулна.
Тапан малуматар себеб яз
РФ-дин общественный палатади “Ватцап” мессенджер агалуниз эвер гана. А. Малькевичан гафаралди, мессенджер Россияда къадагъа авунвай тешкилатдинди я ва ана тапан малуматар лап гзаф раижзава.
Сербия экечIдач
Сербиядин президент А.Вучича уьлкве НАТО-дик экечIдач лагьана. Адан гафаралди, 1999-йисуз НАТО-ди гьужумунин нетижада кьейи аялар Сербияди рикIелай ракъурзавач.
А.Вучича Сербия азад ва военный жигьетдай бейтереф уьлкве тирди рикIел хкана. “Сербияди вичин чилни, цавни вичи хуьда”, — лагьана ада. Адан гафар “Новости” РИА-ди раижнава.
Зулуз кьиле тухуда
Рособрнадзорди малумарнавайвал, Россиядин мектебра тухудай ахтармишунрин кIвалахар (ВПР) исятда ваъ, зулун вахтунда кьиле тухуда. Идакай “Новости” РИА-ди хабар гана.
Къейдзавайвал, ахтармишунин кIвалахар зулал вегьинин себеб коронавирус чукIунин гьерекат къизгъин хъхьунин хаталувилихъ галаз алакъалу я.
Мягькем сагъламвал патал
Духтур-эндокринолог, пегьризчи В. Жиляева “Sputnik” радиодиз хабар гайивал, яргъалди давам хьайи хъуьтIелай кьулухъ инсандин бедендик D витаминдин кьадар тIимил жезва. И карди, пешекардин фикирдалди, четин гьалар арадал гъун мумкин я.
D витамин тIимил хьун иллаки яшар 60 йисалай алатнавайбур патал хаталу я: абурун кIарабра кальций тIимил жезва. Алава хъийизвайвал, бедендик D витамин тIимил хьуни иммунитет зайиф хьунал гъида. Четин гьалар арадал татун патал пешекарди йисан кьиляй-кьилиз витаминрин махсус минералдин комплексар ишлемишун теклифзава.
ТIугъвал
Коронавирусдин тIугъвал акьалтIуникай рахун гьеле фад я, гьикI хьи, бязи уьлквейра цIийи лепе пайда жезва. Ихьтин фикир Гамалеян тIварцIихъ галай центрадин кьил Гинцбурга малумарна.
“Новости” РИА-ди хабар гузвайвал, вирус акатайбурун кьадардал гьалтайла, сад лагьай чкадал США, адан гуьгъуьнал Бразилия, Индия, Россия, Мексика ала. Коронавирусдик дуьньяда 6 миллиондилай гзаф ксар кьена.
«Лезги газет»
