Муниципалитет яшайишдинни экономикадин рекьерай вилик финик еке пай кутунай ва 70 йис тамам хьунихъ галаз алакъалу яз СтIал Сулейманан райондин депутатрин собранидин председатель Штибег Мегьамедхановаз райондин кьил Нариман Абдулмуталибован теклифдалди “СтIал Сулейманан райондин гьуьрметлу агьали” тIвар гана. Медаль вахкудайла, Нариман Абдулмуталибова, юбилей мубарак авунихъ галаз санал, яргъал йисарин баркаллу зегьметдай Штибег Мегьамедхановаз чухсагъул лагьана.
— Районда яшайишдинни экономикадин гзаф проектар уьмуьрдиз кечирмишун Штибег Гьажимегьамедовичан пешекарвилин кIвалахдихъ галаз алакъалу я, — лагьана Нариман Абдулмуталибова. — Ада райондин общественный уьмуьрда активнидаказ иштиракзава, халкьдин арада ва зегьметчи коллективра адаз еке гьуьрмет ава.
Ш.Мегьамедханова райондин администрацияда 2007-йисан декабрдилай инихъ кIвалахзава. 2016-йисан ноябрдалди ам муниципальный райондин администрациядин кьилин къуллугъдал хьана. 2016-йисан декабрдилай инихъ ам депутатрин собранидин председатель я.
Штибег Мегьамедханова райондин хуьрерин мулкар экономикадин ва яшайишдин рекьерай вилик финик, налогар кIватIун артухаруник еке пай кутуна. Район экономикадин рекьяй вилик фин патал кьилдин ксарин пулунин такьатар желб авунин жигьетдайни ада зурба кIвалах тухвана. Эхиримжи 5 йисан къене муниципальный бюджетдин хсуси къазанжияр 118 миллион манатдин артух хьана, республикадин чкадин самоуправленидин органрин кIвалахдин менфятлувиляй районди кьве сеферда приздин чкаяр кьуна.
Штибег Мегьамедханова райондин администрациядихъ галаз санал кIвалахунин нетижада “АПК вилик тухун” милли проектдин сергьятра аваз райондин арендаторриз багълар кутунай ва абурухъ гелкъуьнай 665 миллион манатдилай виниз субсидияр къачудай мумкинвал гана. Эхиримжи 5 йисан къене районда 1203 гектарда багълар ва 552 гектарда уьзуьмлухар кутуна, идахъ галаз алакъалу яз и метлебдин инвестицийри 921 миллион манат тешкилна, производстводин хиле инвестицийри 7 миллиард манатдилай виниз тешкилна. Районда социальный метлеб авай 11 проект уьмуьрдиз кечирмишнава: 2 школа, спортдин 3 майдан туькIуьрна, Кьасумхуьрел хъвадай цин линияр тухвана, школадин автобус ва райондин поликлиника патал мобильный комплекс къачуна.
Штибег Гьажимегьамедовича агьалияр хъвадай хъсан еридин целди таъминарунин месэладизни екедаказ фикир гузва. ИкI, къимет саки 1 миллиард манат тир “Сардаркент-Даркуш-Казмаляр” магистральный водопроводдал кIвалахар акьалтI жезва. 4 хуьруьн поселенийра цин цIийи линияр тухунин кIвалахар кьиле тухузва. Ш.Мегьамедханован теклифдалди районда гъвечIи карчивал, агропромышленный комплекс, дигидай цин къурулуш вилик тухунин тайин метлебдин муниципальный программаяр уьмуьрдиз кечирмишзава.
Яргъал йисарин бегьерлу зегьметдай ва кIвалахда хьанвай агалкьунрай Штибег Мегьамедхановаз “Ватандин вилик лайихлувилерай” ордендин медаль, “Дагъустан Республикадин лайихлу экономист” гьуьрметдин тIвар ганва.
Хазран Кьасумов
