Чун уях я…
Акуна-такуна, кьуьдни алатна. Чи ракIарал Яран сувар-гатфар атанва! ТIебиатда хьиз, инсанрин рикIерани, ниятрани, крарани гзаф цIийивилер кьиле физва. Инсанри уьмуьрдин генгвиликай, мублагьвиликай, яшайишдин къулайвилер артух хьуникай фикирзава.
Амма дуьньяда чIулав къуватарни тIимил туш. Дуьньядал элкъвенвай вилиз таквадай душман-тIугъвал алат тавунмаз, чун агъзур йисара Россиядин са пай, урус халкьдихъ галаз са халкь, са имандин, культурадин, тарихдин векилар яз чизвай украинвияр цIийи фашистринни миллетчийрин, акьалтIай бандитринни террористрин гъиликай хкудунин (михьи авунин) махсус серенжем кьиле тухуниз мажбур хьанва.
США-дин империалист ампаяр кьилеваз, вири Европа сад хьана, Украина Россиядиз аксивалдай, адал гьужумдай (НАТО-дик экечIуналди) душманвилин кьилин къуватдиз элкъуьриз алахъна гзаф йисар тир. 2014-йисуз Украинада, гужуналди государстводин кьилиз цIийи фашистарни бандеровчияр, миллетчиярни акьалтIай бандитар-террористар гъана. Америкадин “демократия” агакьай Украинада, чи бубайри чпин пак ивидалди фашизмдин тIегъуьндикай хвейи чилел, мад гьа тIегъуьндин муг туьхкIуьрна. Ихьтин усалвилел, хаинвилел рази тахьай, чпин чIал, меденият, тарих, аслу туширвал хуьз алахъай ДНР-динни ЛНР-дин агьалияр душманар яз малумарна, абур жазаламишунив эгечIна. 8 йисуз 14 агъзурдав агакьна урусар, урус чIалал рахазвайбур тергна. Урус чIалал рахунални къадагъа эцигна… Душманвилер мадни гзаф хьана. Гьатта ядерный яракь арадал гъунин, Россия терг авунин къайгъуйрик экечIна.
Ихьтин гьалдал, гьакъикъи геноциддал эхир эцигун лазим тир. Ингье гьихьтин шартIара чав цIинин Яран сувар агакьнаватIа.
Амма чун, россиявияр, гьамиша хьиз, гилани уях я! И кар и йикъара вичиз Россиядин Игитвилин чIехи тIвар (гьайиф, кьейидалай кьулухъ) ганвай Нурмегьамед Гьажимегьамедовани субутна!
Чун уях я. Чна гатфар, Яран сувар къаршиламишзава. Чаз ийидай ислягьвилин крар гзаф ава. Чун чи къудратлу Армиядихъ, Президентдихъ, Гьукуматдин къурулушрихъ инанмиш я. Чун гьахълу, чи ниятар михьи я, чун гъалибни жеда!..
Яран суварин цIаяри, крари чи руьгь мадни жанлу ийидайдал шак алач.
Мердали Жалилов
