11-мартдиз Майами шегьерда (США-дин Флорида штат) ММА-дай кьиле фейи “Eagle FC 46” турнирда сифте сефер яз иштиракай  Икрам  Алискерова  чун нубатдин сеферда шадарна. Америкадай тир На-Шон Барреллахъ галаз кьиле фейи бягьсина ам, судьяйрин сад хьтин къарардалди, гъалиб хьанвайди яз малумарна…

Идалди Икрама вичихъ галаз къуватар ахтармишиз экъечIнавай, икьван гагьда галаз-галаз 4 сеферда гъалибвал къазанмишнавай америкави спортсмен «акъвазарна». 32 йисан яшда авай Н.Баррелла какахьай единоборствойрай вири санлай 19 бягьс кьиле тухвана, абурукай (гилан бягьсни кваз) ам 12 сеферда кумукьна. 29 йисан яшда авай Икрама лагьайтIа,  дуьньядин кесерлу майданра вири санлай 12 бягьс (гиландини кваз) кьиле тухвана, анжах сада ам магълуб хьана, амайбур гъалибвал къазанмишуналди акьалтIарна. ИкI, чи ватанэгьлидиз алатай йисан мартдиз Brave CF 49 турнирда — Миро Юркович, 2020-йисан сентябрдиз (Brave CF 41) Денис Тюлюлин кумукьнай.

Рагнеда Рамалданова