Россиядиз мидявал къалурзавай къецепатан бязи уьлквейрин журналистри хвешивилелди къейдзавайвал, чи уьлкведин агьалияр мукьвара “Ютуб” ишлемишуникайни магьрум жеда. Малум тирвал, эхиримжи са шумуд юкъуз РФ-дин государстводин СМИ-рин youtube-каналар агалнава. РикIел хкин, “Ютуб” видеохостингдин сагьибарни дуьньяда гъулгъула тунин тежриба авай США-да ава.
Идалай вилик Роскомнадзорди Россиядин сергьятра инсанри “Фейсбук” ва “Инстаграм” соцсетрикай менфят къачунал сергьят эцигна. Себеб вирибуруз ашкара я. Гьа са вахтунда Госдумадин информациядин сиясатдин рекьяй комитетдин председатель А.Хинштейна къейд авурвал, “Инстаграмда” адетдин малуматар эцигзавайбурун, чапзавайбурун хиве жавабдарвал гьатдач. Амма къанун чIурзавай материалриз, эвер гунриз рехъ гайитIа, ахьтин ксари талукь тирвал жавабни гуда.
Америкади РФ-диз акси яз экономикадин дяве малумарнава. Россиядин вилик-кьилик квай ксари къейдзавайвал, РагъакIидай патан уьлквейри ийизвай санкцийрин гьужумди чаз еримлу жедай цIийи рекьер ачухда.
РагъакIидай патан “къулайвилер» галачизни чи уьлкведихъ гьар са рекьяй пис-хъсан мумкинвилер ава. КIанзавайди а мумкинвилер ишлемишун, мадни еримлу авун я.
МасакIа лагьайтIа, гьа чахъ авай затIарив къадирлувилелди эгечIдай, менфят къачудай макъам алукьнава. Авай шейэрин къимет, къадир чир хьун герек я. Лугьудайвал, генгвилихъ дарвални галайди я.
Информация раижунин, инсанри чпин арада рафтарвилер хуьнин жигьетдай соцсетрихъ къенин аямда еке метлеб ава. Россиядихъ и рекьяйни масадалай аслу тушир мумкинвилер ава. Вахтунин истемишунриз килигна, авай гьаларилай наразивал тавуна, чараяр акуникай фикирна кIанзава.
Маса СМИ-рихъ хьиз, “Лезги газетдихъни” вири соцсетра, мессенджерра кIватIалар ава, яни вахтунихъ галаз кам-камуна аваз физва. Къе къадагъа авунвай “Фейсбук”, “Инстаграм” галачизни гьалар чIур жедач.
“Лезги газетдин” тeIegram-канал фадлай кардик ква. Идалайни гъейри, газетдин чинриз, махсус сайтдиз акъатзавай вири хабарар, макъалаяр “ВКонтакте”, “Одноклассники” соцсетриз акъудзава. Инал чна къалурнавай QR-кодрин куьмекдалди вирибурувай аник экечIиз жеда.
К.Ферзалиев
