Донбассдин мулкар фашистрикай, Украинадин нацистрикай азаддай вахтунда дирибашвал, уьтквемвал къалурай дагъустанви Нурмегьамед Гьажимегьамедоваз Россиядин Игит лагьай тIвар гунихъ галаз алакъалу яз РФ-дин Президент Владимир Путина лагьай гафар гьар садан рикIе гьахьдайбур, руьгь кутадайбур хьана.
“Зун лакви я, дагъустанви я, чеченви, ингуш, урус, татарви, чувуд, мордвин, осетин… я. Зун и алемдин, Россиядин къудратлу, къуватлу, гзаф миллетрикай ибарат халкьдин са пай хьунал за дамахзава”,- лагьана уьлкведин Президентди, Россиядин агьалийрин рикIел чи къуват садвиле авайди хкуналди.
Владимир Путинан гафари руьгь кутунвай вири миллетри, гзаф коллективри, агьалийри уьлкведин Яракьлу Къуватри Донбасс неонацистрикай азад авун патал гъиле кьунвай кар гьахълуди, дуьзди яз гьисабзава.
Россиядин армиядин серенжемрин тереф дагъустанвийрини хуьзва. Дагъустанди чи Яракьлу Къуватрин Z гьарфунин лишандик кваз Севастополди кьил кутунвай эстафета Калмыкиядивай кьабулна ва идахъ галаз алакъалу яз регионда жегьилри, школьникри, ветеранри рейсадвилин мярекатар тешкилзава. Дагъустанди эстафета Чечен Республикадив ва Астрахандин крайдив вахкана.
И жуьредин мярекатар кьиле тухудайла, РД-дин Кьил Сергей Меликова лагьана: “Украинадин миллетчийри, акъваз тийиз, ийизвай гьужумар себеб яз, Донбассдин агьалияр — аялар, дишегьлияр, яшлубур чпин кIвалерай катуниз мажбур хьана. Ихьтин баладик акатнавай инсанар Россиядивай куьмек тагана таз хьанач. Чун са халкь я ва алай макъамда чна чи садвал мадни мягькемди тирди къалурун, кIеве гьатнавай стхайриз, вахариз куьмекдин гъил яргъи авун лазим я. Са рахунни алач, Дагъустанни кьулухъ акъваздач. Дагъларин уьлкведи Донецкдин ва Луганскдин республикайрай катуниз мажбур хьанвай 1268 кас кьабулда. Дагъустанда масадан дердинив кьетIен жуьреда эгечIзавайди я. КIеве гьатнавай касдиз алакьдай куьмек гун гьар са дагъустанвиди вичин буржи яз гьисабзава. Мугьманар хушвилелди кьабулунин гуьзел ва важиблу адет фадлай милли культурадин, къанажагъдин чешме хьанвайди я.
Азад Азадов
