14-мартдиз Дагъустан Республикадин Кьил Сергей Меликован регьбервилик кваз РД-дин энергетикадин ва ЖКХ-дин карханаяр экономикадин жигьетдай дурумлудаказ вилик тухуниз ва газдалди таъминарунин месэлайриз талукь региондин штабдин заседание кьиле фена.

Россиядин Федерациядин Прези­дент­ди Федеральный Собранидиз ра­къурнавай Чарче регионриз газ тухуниз ва агьалияр газдалди таъминаруниз талукь еришар йигинарунин кIвалахар уьмуьрдиз кечирмишунихъ галаз алакъалу яз штаб тешкилнавайди я.

Мярекатда СКФО-да РФ-дин Президентдин гьамишалугъ векилдин заместитель Владимир Надыктоди, “Газпром” ПАО-дин, “Газпром межрегионгаз” ООО-дин, “Газпром газификация” ООО-дин ва талукь министерствойрин, ведомствойрин векилри иштиракна.

Иштиракчийри алатай заседанидал гайи тапшуругъар кьилиз акъудзавай, гьа гьисабдай яз хуьрериз газдин линияр тухузвай кIвалахдик йигинвал кутазвай гьалар веревирдна.

Региондин Кьили мярекатда  СКФО-да РФ-дин Президентдин гьамишалугъ векилдин заместитель Владимир Надыктоди иштиракунин важиблувал, метлеблувал ва республика яшайишдинни экономикадин жигьетдай вилик тухунин карда хуьрер ва агьалияр газдалди таъминарунин месэлаяр кар алайбур тирди къейдна.

Лугьун лазим я хьи, Дагъустанда гилани 11 райондив газ агакьнавач.

Дагъвийрин кIвалериз газ тухуникай рахайтIа, региондин Кьили къейд авуна хьи, алай йисуз 2100 кIвализ кьван газ ту­хун лазим я. Къенин йикъалди анжах 1843 кIвалив газ агакьнава. С. Меликова рикIел хкана хьи, амай кIвалериз жезмай кьван кьуьд алукьдалди газдин линияр хутахна кIанда.

РД-дин регьберди малумарайвал, республикадин чимивилинни энергетикадин комплексда алатнавай йисара гзаф кьадар месэлаяр гьял тавуна амукьнава. Абур уьмуьрдиз кечирмишун патал системный жуьреда эгечIун лазим я. Идахъ галаз санал газораспределительный станцияр ремонт авунин, цIийикIа туькIуьр хъувунин кIва­лахарни яргъал вегьена виже къведач.

Дагъустанвийрин кIвалериз газдин линияр тухунин гьалдикай РД-дин энергетикадин ва тарифрин рекьяй министр­дин везифаяр вахтуналди тамамарзавай Ризван Мурадова ва “Газпром газораспределение Дагестан” ООО-дин исполнительный директор Олег Чиглинцева малумат гана.

Кар алай кIвалах ам я хьи, хуьрерин агьалийриз газдин линияр абурун такьатар­ (пул) ишлемиш тавуна тухузва. КIва­лиз­ газ гъунин гьакъиндай арзаяр газдин эксп­луатациядин къуллугъри, МФЦ-дин фили­ал­ри ва районрин муниципальный тешкилатри кьабулзава.

Дагъустан Республикадин зегьметдин министр Абдурагьман Магьмудова кIва­лерин гьаятрай газдин линияр тухунихъ, кIва­ле ишлемишдай газдин тадаракар эци­гунихъ галаз алакъалу харжияр чкадал хкидай са сеферда гузвай социаль­ный куьмекдикай  лагьана. Ихьтин жуьредин куьмек Ватандин ЧIехи дяведин иштиракчийрив, набутрив, дяведа телеф хьайибурун хендедайрив, гъвечIиз­амаз концлагерра гьатайбурув, далу патан зегьметдин ветеранрив, сад лагьай группадин набутрив, хизандин гьар са касдив яшамиш хьун патал герек пулдин агъа кIанин кьадар агакь тийизвай набут аялар авай хизанрив, 18 йисан яшдив агакь тавунвай  пуд ва адалай гзаф аялар авай хизанрив, кьилди яшамиш жезвай 60 йисалай алатнавай бейкар агьалийрив, газораспределительный идарадихъ галаз икьрар ку­тIунайла, агакьда.

Магьмудова малумарна хьи, минис­терстводин талукь идарайри реестрда авай инсанар яшамиш жезвай вири кIва­лер ахтармишна ва кIвалериз газ тухун лазим тирди, анра инсанар яшамиш жезвайди тестикь хьана. Абурукай социаль­ный куьмек лазимбурни тайинарна. Пулдин такьатар республикадин бюджетдай ахъайда.

Росреестрдин РД-дин управленидин регьбер Арсен Пирмегьамедова, регистрация тавунвай кIвалер аваз хьайитIа, хуьрерин администрацийрин кьилериз, маса санизни тефена, Росреестрдин управленидиз арза кхьинин ихтиярдикай лагьана. Лазим чарар электронный форматда авазни ракъуриз жеда.

Сергей Меликова алава хъувуна хьи, гьар са кIвал регистрация авунилай ам фад газдалди таъминарунни аслу жеда. Ада  муниципалитетрин кьилериз   агьалийрин арада гъавурдик кутунин кIвалах гегьеншаруниз эвер гана.

Мярекатдин сергьятра аваз РД-дин  ЖКХ-дин карханаяр экономикадин жигьет­дай дурумлудаказ вилик тухуниз талукь программа кьилиз акъудзавай гьалдизни килигна. РД-дин Гьукуматдин Председателдин заместитель Манвел Мажонца хабар гайивал, и программа Россиядин экономика вилик тухунин министерстводихъ галаз санал туькIуьрнавайди я.

«Лезги газет»