Малум тирвал, Дагъустандин Кьил Сергей Меликова 2022-йис республикада образованидинди яз малумарнава. И йикъара Кьасумхуьрел СтIал Сулейманан райондин образованидин идарайрин руководителрихъ галаз совещание кьиле фена ва адан сергьятра аваз районда образованидин йис ачухна.
Муниципалитетдин кьил Нариман Абдулмуталибова образованидин хиле зегьмет чIугвазвайбуруз и вакъиа мубаракна, абурун агалкьунар къейдна ва образованидин йис ачухнавайди яз малумарна.
ЦIи райондин образованидин хилен вилик акъвазнавай везифайрикай ва пландик кутунвай кIвалахрикай РУО-да кардик квай информациядинни методикадин центрадин (ИМЦ) директордин заместитель Каминат Усмановади гегьеншдиз суьгьбетна.
Мярекатдал гьакIни СтIал Сулейманан райондин администрациядин образованидин управленидин начальник Гьуьсейн Шихбабаев, адан заместитель Къачабег Аминов, ИМЦ-дин директордин заместитель Венера Абдуселимова ва масабур рахана.
Совещанидин эхирдай Нариман Абдулмуталибова яргъал йисара образованидин хиле зегьмет чIугунай ва агалкьунар къазанмишунай Курхуьруьн 1-нумрадин юкьван мектебдин муаллим Анжелика Шихрагьимовадив РФ-дин просвещенидин министерстводин Гьуьрметдин грамота ва 19 муаллимдив “РФ-дин тербиядин ва просвещенидин гьуьрметлу работник” знакар вахкана.
Хазран Кьасумов
