Мукьвара Махачкъалада Дагъустандин шаиррин эсерар хайи чIаларал хъсандиз кIелунай республикадин дережадин конкурс кьиле фена. Адан тешкилатчи РД-дин образованидин ва илимдин министерство тир. Мярекатда 11-классра кIелзавай аялри иштиракна.
Конкурсда, санлай къачурла, 46 муниципалитетдай 100-лай виниз школьникри иштиракна. Лезги чIалал кIелзавайбурун арада (абур 13 кас авай) 1-чкадиз Мегьарамдхуьруьн райондин Ярагъ-Къазмайрин Ярагъ Мегьамедан тIварунихъ галай юкьван мектебдин ученица Халида Эфендиева лайихлу хьана. Адаз республикадин образованидин ва илимдин министерстводин патай 1-дережадин диплом гана.
Чна Халида Эфендиевадиз ва адан муаллим Магьият Жаруллаевадиз гъалибвал мубаракзава. Къуй абурухъ мадни еке агалкьунар хьурай!
Чи мухбир
