Дербент шегьердин кьил Рустамбег Пирмегьамедов “УК Зелёный город” ООО-дин кьилин инженер Саидмегьамед Саидмегьамедовахъ, “Новая земля” компаниядин векил Ильяс Гильмановахъ ва жавабдар маса ксарихъ галаз са­нал шегьердин пляж алай мулкар авадан авун па­тал тамамарзавай кIвалахар кьиле физ­вай гьалдихъ галаз таниш хьана.

Алай вахтунда шегьердин кьилин пляждал ва “Радиоэлемент” завод авай мул­кара кIвалахар худда гьатнава. Прораб­ Сабижулла Ярагьмедован гафаралди, кIва­лахар кьиле физвай мулкар кул-кусри­кай, къванерикай михьнава. Ус­тIар­ри исятда кьуд километрдин мензилда инсанар къекъведай ва велосипед гьалдай рекьер къайдадик кутазва. КIвалахар акьалтIа­райла, гьазурзавай рекьерин къерехра ял ядайбуруз къулай шар­тIар арадал къведа: футбол ва волейбол къугъвадай спортдин майданар, вор­каут, аялар патал чуьхуьнагар ийидай кьилдин чка ва масабур.

КIвалахар физвай гьалдиз килигайдалай гуьгъуьниз Рустамбег Пирмегьамедова къейд авурвал, алай йисуз шегьердиз къведай туристрин кьадар гзаф хьун мумкин я. Гьавиляй шегьер туристар кьабулиз гиламаз гьазур жезва. Шегьердин кьили эцигунрин асул кIвалахар энгел тавуна акьалтIарунин патахъай тагькимарна.

Къагьриман Ибрагьимов