Зегьметди инсандал абур гъида лугьуда. И гафар мукьвара вичин 70 йисан юбилей къейдзавай Шакир Назаралиевич Назаралиеван гьакъиндайни лугьуз жеда. Хейлин йисара уьлкведин банкдин къурулушда жуьреба-жуьре къуллугърал гьакъисагъвилелди зегьмет чIугур ада алай вахтунда, лайихлу пенсиядиз экъечIна, ял язава.
Шакир Назаралиев Кьурагьрин хуьре дидедиз хьана. Буйнакскдин финансрин техникум акьалтIарайдалай кьулухъ Кьурагь райондин администрациядин финансрин отделда кIвалахиз эгечIна. Им 1972-йис тир. Гьа и йисуз адаз Советрин Армиядин жергейриз къуллугъиз эвер гана. Кьурагьви хци Ватандин вилик вичин хивевай буржи Белоруссияда женгининни гьавадин къуватрин кьушунра къуллугъ авуналди кьилиз акъудна. Армиядилай гуьгъуьниз ада финансрин отделда зегьмет чIугун давамарна.
1979-йисуз Шакир Назаралиев Махачкъаладиз куьч хьана ва ина адал Ленинский райондин администрациядин финансрин отделдин заведующийдин заместителдин къуллугъ ихтибарна. Вичихъ пешедин рекьяй авай чирвилер артухарунин мураддалди ада заочнидаказ ДГУ-дани кIелна.
Уьлкведин экономикадин хиле жуьреба-жуьре дегишвилер кьиле физвай йисар тир. Кредитар чара ийизвай идарайрин кIвалах иллаки кьетIен гуьзчивилик кутунин игьтияж авай. Россиядин Кьилин банкдин къарардалди Дагъустандин Милли банкда коммерциядин банкрин кIвалахдал гуьзчивал тухудай Кьилин управление арадал гъана. ЦIийи управленидиз кар алакьдай, финансрин хилен гъавурда хъсандиз авай пешекарар герекзавай. 1993-йисуз Шакир Назаралиеваз цIийиз арадал гъанвай управленида кIвалах теклифна. Гьа икI, чи ватанэгьлиди хейлин йисара управленидин инспекциядин отделдин кьилин эксперт яз кIвалахна.
Шакир Назаралиева вичин хъсан къилихдалди, пешекарвилелди санал кIвалахзавай юлдашрин арада чIехи гьуьрмет къазанмишна. Адахъ галаз санал кIвалахай РФ-дин Кьилин банкдин Дагъустанда авай управленидин инспекциядин отделдин начальник Омар Омарова Шакир Назаралиевакай хуш келимаяр лугьузва. Адан гафаралди, управленидин кIвалах вилик тухуник ада еке пай кутуна.
2002-йисан декабрдин вацра “Россельхозбанк” ОАО-дин Чечен Республикада (Грозный шегьерда) авай филиалда инспекциядин ахтармишунар кьиле тухвана кIанзавай. А вахтунда республикада авай гьалар хъсанбур тушир. Терроризмдиз акси яз тешкилзавай серенжемрин сергьятра аваз женгинин гьерекатар кьиле физвай. Амма и хаталу гьаларизни килиг тавуна, Шакир Назаралиев управленидин кьил Билал Жагьбаровахъ галаз санал Чечнядиз рекье гьатна, ана авай банкдин филиалда ахтармишунар кьиле тухвана. И кардай абуруз кьведазни РФ-дин Кьилин банкдин Дагъустанда авай Милли банкдин патай разивилин чарарни багьа савкьатар ганай.
Лагьана кIанда, Шакир Назаралиева Россиядин банкдин къурулушда кIвалахай йисара уьлкведин банкрин кIвалахда финансрин гьахъ-гьисабар кьунин жигьетдай кардик квай международный стандартар къайдадик кутуна ва и карди санлай кIвалах вилик финиз таъсирна. Зегьметдин рекье къазанмишнавай агалкьунар фикирда кьуна, Шакир Назаралиеваз 2003-йисуз РД-дин Государстводин Советдин Указдалди «Дагъустан Республикадин лайихлу экономист» лагьай тIвар гана.
Чна Шакир Назаралиевичаз юбилей мубаракзава. Адахъ чандин сагъвал, яргъи уьмуьр хьун чи мурад я!
Агьмед Магьмудов
