СтIал Сулейманан районда “Хуьрерин мулкар комплекснидаказ вилик тухун”, “Шегьердин къулай шартIар арадал гъун”, “Зи Дагъустан — зи рекьер”, “Чкадин теклифар” программайрин, проектрин куьмекдалди еке кIвалах тухузва, хуьрер, мулкар авадан ийизва, агьалийрин яшайиш ва дуланажагъдин шартIар хъсан жезва.
Эхиримжи йисара райондин хуьрерни чIехи ва гуьрчег жезва, анра цIийи микрорайонар, куьчеяр арадал къвезва. Анриз электроэнергиядин, газдин линияр тухун, агьалияр хъвадай целди таъминарун патал еке кIвалах тухузва. И рекьерай Эминхуьре ийизвай кIвалахарни гзаф я. ИкI, эхиримжи 2-3 йисуз ана аялар къугъвадай майданни галай парк ва мини-футболдин майдан туькIуьрна.
1990-2000-йисара арадал атай микрорайонда агьалийри газдин турбаяр чпин къуватралди ва какатайвал тухванвай. Къулайсуз хьунилай гъейри, и кар хаталуни тир. Райондин кьилевайбурун алахъунар себеб яз, 400-дав агакьна кIвалерин майишатар авай микрорайондиз «Хуьрерин мулкар комплекснидаказ вилик тухун» программадин сергьятра аваз газдин цIийи турбаяр тухвана. КIвалахрин заказчик “Дагсельхозстрой” ГКУ тир. Куьчейра газдин турбаяр тухунин кIвалахар пудратчи кархана тир “Нефтекумское СМУ” ООО-дин махсус бригадади еридивди кьилиз акъудна. Микрорайонда цIийиз тухванвай газдин турбайрин яргъивал, санлай къачурла, 26 километр я.
ЦIийи микрорайондиз эквер, хъвадай ядни гъанва, куьчейриз хирхем вегьенва, ана трансформатор эцигнава.
— Микрорайондин агьалийри газдин турбаяр тухунай райондин администрациядиз, заказчик тир ва пудратчи карханайриз сагърай лугьузва, — лагьана чаз Эминхуьруьн АСП-дин кьил Сабир Юзбегова. — Хуьре цIийиз арадал атанвай мад кьве микрорайон ава, анрани аваданламишунин кIвалахар кьиле тухузва. Абурук хуьруьн агьалийрини чпин пай кутазва.
Хазран Кьасумов
