Дуьньядин жуьреба-жуьре уьлквейри Урусатдиз талукь яз санкцияр кьабулунин нетижада уьлкведин хейлин регионра, гьа жигьетдай яз Дагъустандани, бязи метягьрин къиметар хкаж хьанва. Лагьана кIанда, и кардин вилик пад кьун, экономикадин хиле гьалар пайгардикай хкат тавун патал уьлкведа са жерге серенжемар кьабулнава.
Мукьвара РД-дин Кьил Сергей Меликова къейд авурвал, республикадин агьалийри фан ва недай-хъвадай суьрсетдин къиметар хкаж хьунилай наразивилер ийизва. Адан гафаралди, недай-хъвадай суьрсетдин ва яшайишда герек къвезвай маса шейэрин къиметрал гуьзчивал тухун алай вахтунда кар алай месэлайрикай сад я. Региондин Кьили РД-дин рекъемрин рекьяй вилик финин министерстводиз метягьрин къиметар хкажунин гьакъиндай жемиятда арадал къвезвай суалриз жавабар гун патал телефондин махсус нумра (горячая линия) кардик кутунин тапшуругъ гана.
Алай вахтунда Дагъустанда ихьтин нумра кардик кутунва: 98-97-76. Агьалийривай, и нумрадиз зенг авуна (экуьнин сятдин 9-далай нянин 7-далди), бине авачиз къиметар хкажнавайбурукай (кьилдин карчийрикай, алвердал машгъул тешкилатрикай ва икI мад) хабар гуз жеда. Дагъустанвийри гудай малуматрин бинедаллаз, арадал атанвай гьаларикай менфят къачуна, кьасухдай недай-хъвадай суьрсетдин къиметар хкажнавай дуьшуьшар винел акъудда ва и кардин вилик пад кьада.
«Лезги газет»
