РД-дин экономикадин ва мулкар вилик тухунин министерстводин пресс-къуллугъди Урусатдиз талукь яз санкцияр кьабулдалди вилик маса къачунвай метягьар карчийри «куьгьне» къиметрай маса тагунин гъавурда туна.
Хабар гузвайвал, карчийри метягьрин къиметар гележегда цIийи метягьар маса къачудайла акъатзавай харжияр фикирда кьуна тайинарзава. ЦIийи метягьар маса къачудай пулдин такьатрин кьитвал тахьун патал бязи карчийри къиметар хкаждай къарар кьабулнава.
Уьлкведиз талукь яз санкцияр кьабулунин нетижада къецепатан уьлквейрай республикадиз метягь хкуниз акъатзавай харжияр садлагьана хкаж хьанва. Балтикадин портарихъ галаз авай Урусатдин алишверишдин рекьер Ла-Манш проливдай физва — Франциядин ва Англиядин патаривай. И кар себеб яз, Урусатдиз хкизвай метягьар уьлкведин регионрив геж агакьзава, бязибур лагьайтIа, ерли ахъайзавач.
Къиметар хкаж хьунин мад са себеб. Исятда жуьреба-жуьре метягьар маса къачузвайбурун кьадар садлагьана гзаф хьанва. Муьштерийрин кьадар артух хьуникди бязи карчийри къиметарни хкажзава.
«Лезги газет»
