7-мартдиз Дагъустандин халкьдин шаир СтIал Сулейманан музейда Кьиблепатан Дагъустандин районрин мектебра кIелзавай аялрин арада “Урус муаллимдив — кIанивилелди” лишандик кваз мукьвара кьиле фейи конкурсдин гъалибчияр тебрикуниз талукьарнавай мярекат кьиле фена.
Къейд ийин хьи, СтIал Сулейманан райондин администрациядин куьмекдалди тешкилай и конкурсдин кьилин спонсор машгьур меценат Нариман Гъазалиев тир.
Гъалибчийрив савкьатар вахкуниз талукьарнавай мярекатда райондин кьил Нариман Абдулмуталибова, адан сад лагьай заместитель Лацис Оружева, Докъузпара райондин кьилин заместитель Салигь Гьажимурадова ва масабуру иштиракна.
Конкурсдин нетижада 1-чкадиз — Курхуьруьн 1-нумрадин мектебдин ученица Амина Шихрагьимова, 2-чкадиз — ЦIийи Къаракуьредин мектебдин ученик Мерлан Эюбов, 3-чкадиз Белиж поселокдин Г.Лезгинцеван тIварунихъ галай мектебдин ученица Азиза Мегьамедова лайихлу хьана. Абур дипломриз ва 30, 20, 10 агъзур манатдин кьадарда аваз пулдин пишкешриз лайихлу хьана. 1 агъзур манатдин кьадарда аваз пулдин пишкешар гьакIни конкурсда иштиракай мад 40 аялдив вахкана.
Къейд ийин хьи, Нариман Гъазалиеван куьмекдалди Кьиблепатан Дагъустандин районрин мектебра кIелзавай аялрин арада конкурсар тухуз са шумуд йис я. Нубатдин конкурс майдин вацра кьиле фида. Ам ЧIехи Гъалибвилин сувариз бахшда ва Советрин Союздин Игит Валентин Эмирован кьегьалвилерихъ галаз алакъалу ийида.
Агьмед Магьмудов
