8-Мартдин суварин вилик Дагъустандин Кьил Сергей Меликова яшайишдин жуьреба-жуьре хилера тафаватлу хьайи дишегьлийрив государстводин шабагьар вахкана. “Лезги газетдиз” РД-дин Кьилин пресс-къуллугъди хабар гайивал, санлай къачурла, 23 кас орденризни медалриз, грамотайризни разивилин чарариз лайихлу хьана. Абурун арада РФ-дин Президент В.Путинан къул алайбурни ава.
Мярекатдин иштиракчийриз 8-Мартдин сувар мубарак авунихъ галаз сад хьиз, Сергей Меликова дагъустанви дишегьлийри республикада образование, илим, здравоохранение ва маса хилер вилик финик кьетIен пай кутазвайди къейдна.
“Чна дагъви дишегьлийрал гьахълудаказ дамахзава. Куьне несилрилай несилрал гзаф миллетрикай ибарат Дагъустандин халкьдин руьгьдин ивирар агакьарзава, хайи чил баркаллу ийизва, уьмуьрда дуьз рекьер къалурзава”, — къейдна С.Меликова, Дагъустандин халкьдин шаир Фазу Алиевадин шиирдай бендер кIелуналди.
Шабагьриз лайихлу хьайибурун арада Хив райондин больницадин кьилин акушерка Басират Алирзаева, Махачкъаладин аялар хадай 1-нумрадин кIвалин кьилин духтур Земфира Гьажиева, Къизляр шегьердай тир цIуд аялдин диде Разият Амиралиева, СтIал Сулейманан райондин Герейханован хуьруьн 1-нумрадин юкьван мектебдин муаллим Сегьерханум Османова, РКБ-дин медсестра Сабина Омарова ва масабур авай.
«Лезги газет»
