РФ-дин Президент Владимир Путинан Указдалди ери-бине Дагъустандин Къули райондин Кани хуьряй тир Нурмегьамед Энгельсович Гьажимегьамедоваз телеф хьайидалай кьулухъ Россиядин Федерациядин Игитдин тIвар гана.
Старший лейтенант Н.Гьажимегьамедован 25 йис тир. Россияди Украинада махсус операция гатIунай сифте йикъара чи ватанэгьли дяведин къизгъин гьерекатар кьиле физвай мулкарал акъатна. Са женгина ада регьбервал гузвай десте Украинадин боевикрин гьалкъада гьатна. Н.Гьажимегьамедован къаст сад тир: вичел ихтибарнавай кьетIен метлеб авай дяведин тапшуругъ кьилиз акъудун. Залан хер хьанвайтIани, дирибаш дагъустанвиди женг давамарзавай. Къутармиш жедай мумкинвал авачирди якъин хьайила, ада вичив гвай граната хъиткьинарна. Нетижада вични телеф хьана, ам гьалкъада тунвай боевикарни.
Владимир Путина, Н.Гьажимегьамедован игитвилиз къимет гудайла, къейд авурвал, ам халис командир тир. “…Нурмегьамед Гажимегьамедова вичи вич гранатадал хъиткьинарна… Адаз вичи нихъ галаз женг тухузвайтIа хъсандиз чизвай: есирда гьатнавайбуруз жуьреба-жуьре инадар кьазвай, абурун чанариз вагьшивилелди къаст ийизвай неонацистрихъ галаз. Гьавиляй игитди ихьтин къарарни кьабулна…”.
Телеф жедалди пуд югъ амаз Н.Гьажимегьамедоваз руш хьана. Гьайиф хьи, игитдиз вичин велед гъилерал кьун кьисмет хьанач, адаз ам дидеди ва уьмуьрдин юлдашди ракъурай шикилрай акуна…
Къейд ийин хьи, Н.Гьажимегьамедован дах Энгельс Нурмегьамедов полициядин полковник я, ада Ингушетиядин къенепатан крарин министерствода кIвалахзава. Диде Сапижат Исаевна сифтегьан классрин муаллим я.
Н.Гьажимегьамедов Украинада кьиле физвай махсус операциядин вахтунда Россиядин веонный къуллугъчийрикай РФ-дин Игитдин тIварцIиз лайихлу хьайи сад лагьай кас я. Ам хайи хуьре кучукнава. Махачкъаладин са куьче адан тIварунихъ ядайвал я.
Чи мухбир
