Зенд
2019- йисуз А.Омарова, М.Бабаханова кхьенвай СтIал Сулейманан райондин 90 йисаз талукьарнавай “Край мыслителей и поэтов” ктаб чапдай акъатна. Абурукай сад райондин кьил Нариман Шамсудинович Абдулмуталибова, вичин къул алаз, хъсан чими гафар кхьена, зазни багъишна.
Ктабдин мана-метлебди зун гьейранарна. Ам хъсан куьмекчи я муаллимриз, аялрихъ галаз тербиядин кIвалах тухузвай вирибуруз. ГьикI хьи, ана чи ватандин ва халкьдин къагьриманвилин руьгь ава.
Ктабда чи райондин экономикадиз, культурадиз, образованидиз, уьмуьрдин вири хилериз талукь лап герек делилар, рекъемар, шикилар ава. Шикилриз килигай инсан гъавурда гьатда: чи чилериз гьакьван багьа, гуьрчег тIебиат хас я. Хуьрериз, куьчейриз, рекьериз килигайла чир жезва хьи, чи инсанар яшамиш жезвай гьалар къвердавай хъсан жезва. Хуьрера цIийи кIвалер эцигнава, куьчейра къир цазва, къван твазва. ЦIийи хуьрер, багълар, фермаяр, школаяр, туьквенар, базарар, кар-кеспидин цIийи цехар арадиз къвезва. Инсанриз чпин кьил хуьдай мумкинвилер артух жезва.
Ктабдин чинрай кIелзавайдаз райондин кIвенкIвечи рабочийрин, багъманчийрин, алимрин, генералрин, духтуррин, муаллимрин, артистрин, шаиррин, спортсменрин шикилар, тIварар, абурукай куьрелди кхьенвай малуматар жагъизва. Гьакъикъатдани, чи район шаирринни арифдаррин, алимринни генералрин, зегьметдал, хайи ватандал рикI алай инсанрин макан я!
Етим Эминан, СтIал Сулейманан, Алкьвадар Гьасан эфендидин, академик Абдусалам Гьуьсейнован, генералар — стхаяр тир Михаил ва Сергей Меликоврин, генералар-стхаяр Гьажи-Къурбан ва Мегьамед-Гьанифа Шайдаеврин, генерал Тагьир Эминован, Россиядин Игит Радим Халикьован, лап зурба премийрин лауреат Генрих Гьасанован, композиторар: Готфрид Гьасанован, Сейфуллагь Керимован, Россияда виридалайни жегьил физик, илимрин доктор Заур Алисултанован ва гзаф маса алимрин, шаиррин, къагьриманрин ватан тушни бес! И ватанди чи республикадиз ва вири чIехи уьлкведиз гзаф руководителар, экономика, дуланажагъ вилик тухуз алакьай ксар гайиди чир жезва. Ктабда абуруз лайихлу чка ганва.
Ктабдин эхирдай райондай акъатай вири алимрин сиягьар, абурун фамилия, тIвар, хайи хуьр, алимвилин дережа къалурна, ганва. Им чаз, кIелзавайбуруз, дамахдай кар хьанва. И сиягьдиз килигайла, аквазва, СтIал Сулейманан райондай 283 алим, абурукай 65 кас илимрин докторар акъатнава. Им гъвечIи рекъем туш.
Дагъустанда мад икьван алимар ганвай маса район аватIа, заз чидач.
Лагьана кIанда, кьилди хуьрер къачуртIани, алимар Зугьраба хуьряй, Гъетягъай, Алкьвадрилай, Цмурдилай, Курхуьрелай, Агъа СтIалдилай, Кьасумхуьрелай гзаф акъатнава.
Ктабдай, алимрин хьиз, чи район магьшур авур хейлин руководителрин тIварарни чир жезва. Герейханован тIварцIихъ галай совхоздин директор хьайи Мигьрали Бачханов, “Калининский” совхоздин директор хьайи Сиражудин Альдеров, Кьасумхуьруьн консервиярдай заводдин директор хьайи Рамазан Расулов ва масабур гьа жергедай я. РикIелай физвач абурун тIварар! Вучиз лагьайтIа, абуру, чпин нефс къати тавуна, халкь патал югъди-йифди зегьмет чIугуна!
Ктаб гьар са хизанда хьана кIанзавай ядигар я. За адакай, школайра аялрихъ галаз гуьруьшмиш жедайла, менфят къачузва.
Масуб Магьмудов,
отставкада авай полковник
