18-февралдиз Кьасумхуьрел “Лезги чIал хуьнин, еримлу ва машгьур авунин карда милли прессади кьунвай чка” лишандик кваз кьиле фейи илимдинни тежрибадин конференцияди къецепатан уьлквейрай, Урусатдин жуьреба-жуьре регионрай, Дагъустандин шегьеррайни районрай алимар, муаллимар, мухбирар, хайи чIалахъ рикI кузвай цIудралди ватанэгьлияр сад авуна. Мярекат ДГУ-дин филологиядин факультетдин Дагъустандин чIаларин кафедрадин иштираквал аваз ва мергьяматлувилин “Умуд” фондунин куьмекдалди СтIал Сулейманан райондин администрацияди тешкилнавай.
ЧIалан форум гатIундалди вилик райондин са шумуд бахчада тербияламиш жезвай аялри Алирза Саидован “Лезги чIал” шиир кIелна. И.Тагьирован тIварунихъ галай медениятдин макандин фойеда хайи чIалаз талукьарна гьазурнавай выставкайри, шикилрин альбомри, жуьреба-жуьре конкурсрин материалри, лезги халкьдин медениятдиз, тарихдиз, хуьрекриз талукь пипIери мугьманрин фикир чпел желбзавай…
Мярекатдин асул пай райондин кьил Нариман Абдулмуталибова мугьманар тебрикуналди ачухна. Ада къейд авурвал, X сеферда кьиле физвай форумдихъ хайи чIал хуьнин ва вилик тухунин карда еке метлеб ава. “Заз сифте нубатда важиблу и мярекат арадал гъуник пай кутунвай вири юлдашриз — образованидин, медениятдин управленийрин, информациядин агентстводин векилриз, муаллимриз, тербиячийриз сагърай лугьуз кIанзава. Конференциядал веревирд авун патал теклифнавай темадихъ хайи чIал патал акьалтIай важиблувал ава, гьикI лагьайтIа, милли прессади хайи чIал хуьнин карда кьетIен чка кьазва. Конференция кьве юкъуз давам жеда. 19-февралдиз чIалан пешекаррин иштираквал аваз секцийра кIвалах давам жеда…” — къейдна Н.Абдулмуталибова. Ада гьакIни лезги чIалаз, тарихдиз, медениятдиз талукь проектар кьилиз акъудиз датIана куьмекар гузвай “Умуд” фондунин, ам арадал гъайи РД-дин Халкьдин Собранидин депутат Имам Яралиеван тIварарихъ разивилин келимаяр лагьана.
Гуьгъуьнлай гаф алим Гьамидуллагь Мегьамедоваз гана. Вичин рахунра ада республикада чIалан сиясат арадал атунин тарихдикай, Дагъустандин хайи чIаларин дережа хуьн патал региондин парламентди тухвай кIвалахрикай ихтилатна. Профессордин гафаралди, чIалариз талукь хейлин месэлаяр гьял тавуна ама. Ада хайи чIаларин дережа хкажун, республикадин жемиятдинни сиясатдин уьмуьрда абуруз кьетIен чка тайинарун, къецепатан регионра Дагъустандин чIалар хуьн патал къайдадик кваз кIвалах тухун герек тирди къейдна.
Конференциядин иштиракчийриз РД-дин Халкьдин Собранидин ва Гьукуматдин тIварунихъай республикадин парламентдин образованидин ва илимдин Комитетдин председателдин заместитель Абдулвагьид Лабазанова хайи чIалан сувар мубаракна. Депутатди вичиз хайи чIалан гьуьрметдай ихьтин дережада аваз тешкилнавай мярекат сад лагьай сеферда аквазвайди хиве кьуна ва и кардик пай кутунвай вири юлдашриз сагърай лагьана.
Саки кьуд сятда давам хьайи конференциядал веревирд ийизвай месэлайрин гьакъиндай чпин фикирар тарихчи, публицист Ризван Ризванова, “Лезги газетдин” кьилин редактор Мегьамед Ибрагьимова, лезги чIалал акъатзавай “Дагъустандин дишегьли” журналдин редактор Наира Ибрагьимовади, “Куьредин хабарар” газетдин кьилин редактор Асият Мирзалиевади, “ЦIийи дуьнья” газетдин кьилин редактор Дашдемир Шерифалиева, Кьурагь райондин кьилин заместитель Рамазан Катибова, Дагъустандин писателрин лезги секциядин регьбер Владик Батманова, Тахо-Годидин тIварунихъ галай Педагогикадин институтдин илимдин къуллугъчи Жаклина Мейлановади, ФЛНКА-дин векил Асрет Ибилкьасумова, Хив райондин образованидин управленидин методист Къачмаз Меликова, шаир Сажидин Саидгьасанова, лезги чIалан муаллимар тир Гъулангерек Ибрагьимовади, Минаят Муталибовади ва масабуру лагьана.
Мярекатдин сергьятра аваз СтIал Сулейманан райондин мектебра кIелзавай аялри лезги чIалакай шиирар кIелна, иштиракчийри интернетдин куьмекдалди Азербайжанда акъатзавай “Самур” газетдин кьилин редактор Седакъет Керимовадин, шаир Эйваз Гуьлалиеван, алай вахтунда Саудиядин Аравияда авай шаир, илимрин кандидат Сардар Абилан, Голландияда яшамиш жезвай шаир Гуьлжагьан Мисрихановадин, Къазахстанда авай лезги медениятдин “Самур” тешкилатдин кьил Гьажимегьамед Селимован, Санкт-Петербургда муаллим яз кIвалахзавай шаир Гуьзеля Гьасановадин тебрикрихъ яб акална.
Гуьгъуьнлай Н.Абдулмуталибовани “Умуд” фондунин векил Савин Велиева “Куьредин хабарар” газетдин мухбиррив, районда кьиле тухванвай жуьреба-жуьре конкурсра гъалиб хьайи шаиррив, муаллимрив, бахчайрин тербиячийрив, аялрив гьуьрметдин грамотаяр, пулдин пишкешар, багьа савкьатар вахкана.
Мегьамед Ибрагьимова хайи чIал хуьнин рекье гьакъисагъвилелди зегьмет чIугвазвай Нариман Абдулмуталибоваз, “Лезги газетдихъ” галаз алакъаяр хуьзвай виридалайни яшлу мухбир, шаир Сажидин Саидгьасановаз, лезги чIаланни урус чIалан гафарган акъуднавай Дагъустандин халкьдин шаир Майрудин Бабахановаз ва “Куьредин хабарар” газетдин 90 йис тамам хьунихъ галаз алакъалу яз анин коллективдиз “Лезги газет” — 100 йис” медалар гана.
Эхирдай СтIал Сулейманан райондин мектебра кIелзавай ва бахчайра тербияламиш жезвай аялри гайи концертди мярекат мадни гурлу авуна.
Конференциядин кIвалахдикай гегьеншдиз “Лезги газетдин” сайтдай кIе-лиз жеда.
Агьмед Магьмудов
