Дербент райондин Белиж хуьруьн 2-нумрадин юкьван школадин 5-классда кIелзавай Абуш Гьажиева январдин эхирра Махачкъалада 5-сеферда кьиле фейи “Науки юношей питают” конкурсда иштиракна. Аниз саки 500 касди агъзурдалай гзаф кIвалахар рекье тунвай.
Нетижада Абуш Гьажиева вичин илимдин руководителрихъ-муаллимрихъ (Хонча Къурбанова, Савара Гьажиева, Наргиз Мамедова) галаз “Дагъустандин тарих” предметдай кхьенвай ахтармишунрин илимдин кIвалах 2-чкадиз лайихлу хьана.
Наргиз Мамедовадин гафарай малум хьайивал, Абуш хъсан тербия авай, вадралди кIелзавай гада я. Адан тIвар школадин Гьуьрметдин доскада ава. Жаванди спортдин рекьяйни аквадай хьтин агалкьунар къазанмишзава. Мукьвара Дербент шегьердин кIвенкIвечивал патал дзюдодай кьиле фейи ачух турнирда ада сад лагьай чка кьуна.
Къагьриман Ибрагьимов
