2022-йисуз Россияда уьлкведин агьалийрин рекъемрихъ галаз алакъалу рекьерай савадлувал артухарунихъ элкъуьрнавай ва яргъал вахтуналди фикирда кьунвай программа кардик кутада. Идакай РФ-дин гьукуматдин телеграм-каналди хабар гузва.
Программадин сергьятра аваз агьалийрин жуьреба-жуьре дестеяр, гьа жергедай яз студентар, пенсионерар ва аялар патал гьазурнавай образованидин цIийи сервисар арадал гъида.
Программа туькIуьрунин ва ам уьмуьрдиз кечирмишунин рекьериз субсидия къачуник рекъемрин рекьяй савадлувал хкажунин хиле икьван чIавалди проектар кьилиз акъудай тешкилатривай умуд кутаз жеда. Государстводин патай куьмек конкурсдин нетижада хкягъайбурувай къачуз жеда. Ам рекъемрин рекьяй вилик финин, алакъадин ва массовый коммуникацийрин министерстводи кьиле тухуда.
Санлай къачурла, 2024-йисалди программадиз субсидияр чара авун патал 600 миллион манат — гьар йисуз 200 миллион манат — рекье твада. Финансар федеральный бюджетдай федеральный милли “Рекъемрин экономика” программадин “Информациядин хатасузвал” проектдин сергьятра аваз чара ийидайвал я. Ихьтин программа кардик кутунин себеб ам я хьи, онлайн-шартIара кIвалахун патал агьалияр, гьар са кас рекъемрин жигьетдай савадлуди яз хьунин важиблувал къвердавай артух жезва. Программадиз талукь яз баянар гузвайбуру гьисабзавайвал, хатасузбур тушир сайтриз гьахьуни, интернет-сетда авай луту-птуйрин гьерекатрай кьил акъудиз тахьуни инсанрин гуьгьуьлар чIурдай нетижайрал гъизва.
«Лезги газет»
